ތިނަދޫ ކައުންސިލްގެ މޭޔަރާ ޑެޕިއުޓީއަށް ފިޔަވަޅު އެޅީ އުސޫލާ ހިލާފަށް: އެމްޑީޕީ
ލޯކަލް ގަވަމަންޓް އޮތޯރިޓީ (އެލްޖީއޭ) އިން ގދ.ތިނަދޫ ސިޓީ ކައުންސިލްގެ މޭޔަރު ސައުދު އަލީ އާއި ޑެޕިއުޓީ މޭޔަރު ނަސްރުﷲ އަލީ އާމެދު ފިޔަވަޅު އަޅާފައިވަނީ، އުސޫލްތަކާ ހިލާފަށްކަމަށް އިދިކޮޅު އެމްޑީޕީން ބުނެފިއެވެ.
ތިނަދޫ ކައުންސިލްގެ މޭޔަރާއި ޑެޕިއުޓީ މޭޔަރަށް ފިޔަވަޅު އެޅުމަށް ނިންމުމާ ގުޅިގެން އެކަން ކުށްވެރިކޮށް އެމްޑީޕީން ނެރުނު ބަޔާނުގައި ބުނެފައިވަނީ، އެލްޖީއޭގެ އެ އަމަލަކީ އަންނަ އަހަރު އޮންނަ ލޯކަލް ކައުންސިލް އިންތިހާބާ ދިމާކޮށް އެ ކައުންސިލުގެ އަގު ވައްޓާލައި، އެމްޑީޕީއަށް ނިސްބަތްވާ މެމްބަރުންގެ ބާރު ކަނޑުވާލުމަށް ވެރިކަންކުރާ ޕީއެންސީން ކޮށްފައިވާ ކަމެއް ކަމަށެވެ.
އެމްޑީޕީން ބުނީ އެލްޖީއޭއިން އެ ފިޔަވަޅުތައް އަޅާފައިވަނީ، ތިނަދޫ އުތުރުދާއިރާގެ މެމްބަރު ސައުދުﷲ ހިލްމީ ބޭނުންފުޅުވާގޮތަށް އެ ކައުންސިލުން އަމަލުކުރަމުން ނުދާތީ، އެ ކައުންސިލަށް ހުށަހެޅުނު ހަގީގަތެއްނެތް މައްސަލައަކާ ގުޅިގެން ކަމަށެވެ. އެމްޑީޕީން ވަނީ އެ މައްސަލަތައް ނުބަލައި އެލްޖީއޭއަށް ނުފޫޒު ފޯރުވައި ކައުންސިލަރުން ވަކިކުރާނޭކަމުގެ އިންޒާރުވެސް ދީފައިވާކަމަށް ބުނެފައެވެ.
ތިނަދޫ ކައުންސިލުން އެ މައްސަލާގައި އެލްޖީއޭއަށް އެއްބާރުލުންދީފައިވާކަމަށް އެ ކައުންސިލުން ބުނެފައިވާ ކަމަށާއި، މިއަދު ކައުންސިލަރުން ސަސްޕެންޑް ކުރީ އެ ކައުންސިލްގެ އިދާރީ ހިންގުން އިސްލާހުކުރަން އެއްވެސް ފިޔަވަޅެއް އަޅަން އެންގުމެއްވެސް ނެތިކަމަށް އެމްޑީޕީން ވަނީ ބަޔާނުގައި ބުނެފައެވެ.
ޕީޕީއެމް /ޕީއެންސީ ވެރިކަމުގައި މިބާވަތުގެ ގާނޫނާ ހިލާފްކަންކަން ކުރަމުން އަންނަކަން ފާހަގަކުރަމުން އެމްޑީޕީން ބުނީ، ކައުންސިލްތަކުގެ ގާނޫނީ ޒިންމާ އަދާކުރުމަށް ސަރުކާރުން އަޅަމުންދާ ހުރަސްތަކާ ދެކޮޅަށް ޝަރުއީ މަރުހަލާ މެދުވެރިކޮށާއި މަޖިލީސް މެދުވެރިކޮށް އެމްޑީޕީން މަސައްކަތް ކުރަމުންދާނޭކަމުގެ ޔަގީންކަންދޭކަމަށެވެ. އަދި އެމްޑީޕީން ވަނީ ސަރުކާރުން ކުރާ މިފަދަ ގާނޫނާ ހިލާފް ފިޔަވަޅުތަކާ ދެކޮޅަށް ރާއްޖޭގެ ހުރިހާ ކައުްނސިލްތަކުން ތެދުވުމަށް ގޮވާލާފައެވެ.
އެލްޖީއޭއިން މިއަދު ވަނީ ގދ. ތިނަދޫ ސިޓީގެ މޭޔަރު ސައުދު އަލީ އާއި ޑެޕިއުޓީ ނަސްރުﷲ އަލީ އަށް މުސާރަ އާއި އިނާޔަތް ނުލިބޭ ގޮތަށް ސަސްޕެންޑް ކުރަން ނިންމާފައިވާކަން އިއުލާނުކޮށްފައެވެ. އެލްޖީއޭ އިން މި ނިންމުން ނިންމީ ތިނަދޫ ކައުންސިލާއި ގުޅޭގޮތުން އެލްޖީއޭ އިން ކުރިއަށް ގެންދިޔަ އިންކުއަރީއަށް ފަހު އެވެ
އިންކުއަރީގައި ބަލާފައިވާ ބައެއް މައްސަލަތައް
* އިދާރާތަކުން ފޮނުވާ ސިޓީތަކަށް ޖަވާބުނުދީ ފޮނުވާލާ މައްސަލަ
* ތިނަދޫން އެހެން ރަށަކަށް ރަށްވެހިކަން ބަދަލުކުރުމަށް ހުށައެޅުމުން 5,000 ރުފިޔާގެ ފީއެއް ނަގާ މައްސަލަ
* ތިނަދޫން އެހެން ރަށަކަށް ރަށްވެހިކަން ބަދަލުކުރުމުގެ ކައުންސިލުން ފީއެއް ނެގުމަށް ނިންމާފައިވާ ނިންމުން ބަދަލުކުރުމަށް އެލްޖީއޭ ބޯޑުން އެންގުމުން އަމަލު ކުރި މައްސަލަ
* އަތޮޅު ކައުންސިލުންނާއި ސަރުކާރުގެ އެހެން އިދާރާތަކުން ތިނަދޫ ކައުންސިލުން ހޯދުމަށް އެދޭ މައުލޫމާތު ނުފޮނުވުން
* އަތޮޅު ކައުންސިލުން އަންގާ އެއްވެސް އެންގުމަކަށް ތިނަދޫ ކައުންސިލުން އަމަލު ނުކުރާ މައްސަލަ
Advertisement
This content is created and paid for by advertisers and does not involve Voice Journalists
