އެލްސީވީއެއް ބަންޑުން ޖަހާލައި ކަނޑުމަތީގައި ހިނގި ހިތާމަވެރި ހާދިސާގައި ނިޔާވި ވޮރަންޓް އޮފިސަރު 2 އަލީ ހާމިދުގެ ޖަނާޒާ ސިފައިންގެ ރަސްމީ އިއްޒަތުގައި މިރޭ ބާއްވައިފިއެވެ.

ހާމިދުގެ ޖަނާޒާ ބާއްވާފައިވަނީ މިރޭ 22:45 ގައި މަސްޖިދުއް ޒައިދު ބިން ޘާބިތު (ހުޅުމާލެ ސަހަރާ) ގައެވެ.

މި ޖަނާޒާގައި ދިފާޢީ ވަޒީރު، މުހައްމަދު ޣައްސާން މައުމޫނާއި، ޗީފް އޮފް ޑިފެންސް ފޯސް، މޭޖާ ޖެނެރަލް އިބްރާހީމް ހިލްމީ އާއި ވައިސް ޗީފް އޮފް ޑިފެންސް ފޯސް، ބްރިގޭޑިއާ ޖެނެރަލް އަޙްމަދު ޣިޔާޘް އާއި ޖެނެރަލް އޮފިސަރުން އަދި ގިނަ އަދަދެއްގެ ސިފައިންން އާއިލާއާ ބައްދަލު ކޮަށް ތައުޒިޔާ ކިޔާފައިވެ އެވެ.

ހާމިދުގެ ޖަނާޒާ ރަސްމީ އިއްޒަތުގައި ބޭއްވުން -- ފޮޓޯ: އެމްއެންޑީއެފް

މި ޖަނާޒާގައި، ހާމިދުގެ މޫނު ދެއްކުން ކުރިއަށް ދިޔަ ވަގުތު، ސިފައިން ވަނީ ސަންދޯއް ކައިރީ ގާޑް މައުންޓްކޮށްފައެވެ. އަދި، މަސްޖިދުއް ޒައިދު ބިން ޘާބިތުގައި ކުރި ކަށުނަމާދަށް ފަހު، ސަންދޯއް އުފުލާފައިވަނީ ސިފައިންގެ ސަންދޯއްވެރިންގެ ކޮނޑުމަތީގައެވެ. އަދި، ސަންދޯއް ވަޅުލުމުގެ ކުރިން، ސަންދޯކުގައި އަޅާފައި އޮތް ދިވެހިރާއްޖޭގެ ގައުމީ ދިދަ، އަލީ ހާމިދުގެ އާއިލާއާ ވަނީ ހަވާލުކޮށްފަ އެވެ.

މި ޖަނާޒާގައި ސިފައިން ވަނީ ހަތްބަޑީގެ ސަލާމާއި، ރަސްމީ ކުރުނީސް އަރުވާފައެވެ.

ކާށިދޫ ކަނޑަށް ލޭންޑިންގ ކްރާފްޓެއް ބަންޑުން ޖަހާލައި ހިނގި ހިތާމަވެރި ހާދިސާގައި ހާމިދު، މި ދުނިޔެއާ ވަކިވެދިއުމަކީ ދިވެހި ސިފައިންނަށް ލިބުނު ވަރަށް ފުން ހިތާމައެއް ކަމަށް އެމްއެންޑީއެފުން ބުނެ އެވެ.

ހާމިދުގެ ޖަނާޒާ ރަސްމީ އިއްޒަތުގައި ބޭއްވުން -- ފޮޓޯ: އެމްއެންޑީއެފް

ހާމިދު ވަނީ ސިފައިންގެ ހިދުމަތުގައި 27 އަހަރު ހޭދަކޮށްފަ އެވެ.

ތ.ހިރިލަންދޫއަށް އުފަން ހާމިދު ސިފައިންގެ ޚިދުމަތާ ގުޅިފައި ވަނީ 1998 އެޕްރީލު 21 ވަނަ ދުވަހުއެވެ. އޭނާއަށް އަސްކަރީ ޚިދުމަތުގައި ވަނީ، ފަސް މެޑެއްޔާއި، ހަތަރު ޝަރަފުގެ ކުލަ ލިބިފް އެވެ. އެ ގޮތުން ލިބިފައިވާ ކުލަޔާއި މެޑެލިތަކުގެ ތެރޭގައި، 17ވަނަ ސާކްސަމިޓް މެޑެލި، އިންސާނީ ޚިދުމަތުގެ މެޑެލި، އަޚްލާޤީ މެޑެލި، ސިފައިންގެ ޚިދުމަތުގެ މެޑެލި، މިނިވަން ފަންސާހުގެ މެޑެލި، އަޚްލާގީ ކުލަ ތިންވަނަ ފަހަރަށް، އިޚްލާޞްތެރި ޚިދުމަތުގެ ކުލަ، ސިފައިންގެ ޚިދުމަތުގެ ކުލަ އަދި ކާމިޔާބުގެ ކުލަ ހިމެނެއެވެ.

ހާމިދުގެ ޖަނާޒާ ރަސްމީ އިއްޒަތުގައި ބޭއްވުން -- ފޮޓޯ: އެމްއެންޑީއެފް

ވޮރަންޓް ހާމިދު ފުރިހަމަ ކޮށްފައިވާ އަސްކަރީ ތަމްރީނުތަކުގެ ތެރޭގައި ބަންގްލަދޭޝްގައި ފުރިހަމަކުރެއްވި އެންބީސީޑީ ކޯހާއި، އިންސްޓްރަކްޝަނަލް ޓެކްނީކްސް ކޯހާއި، 11ވަނަ ސްޕެޝަލް ޓާސްކް ފޯސް ޓްރޭނިންގގެ އިތުރުން، ކޯސްޓްގާޑް ބޭސިކް ޓްރޭނިންގ އަދި ބޭސިކް ފަޔަރ ފައިޓިންގ ކޯސް ހިމެނެއެވެ.

ހާމިދު ނިޔާވުމުގެ ހިތާމައިގައި،  މިރޭ 00:00އިން މާދަމާ ރޭ 00:00 އަށް ސިފައިންގެ ދިދަ ބައިދަނޑިއަށް ވަނީ ތިރިކޮށްފަ އެވެ.