ގުޅީފަޅުގެ ލޭންޑް ޔޫސް ޕްލޭނަށް އައި ބަދަލާ ގުޅިގެން ބާތިލްކުރި ގޯތިތަކުގެ އެއްބަސްވުމާ ރަޖިސްޓްރީ އަލުން ދޫކުރަން ތައްޔާރުވެއްޖެއެވެ.

މިކަމާ ގުޅޭގޮތުން މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓަކްޗާއިން ބުނީ، ބިންވެރިޔާ ސްކީމުގެ ދަށުން ގުލީފަޅުން ގޯތި ލިބިފައިވާ ފަރާތްތަކަށް މީގެކުރިން ދޫކޮށްފައިވާ އެއްބަސްވުމާއި ރަޖިސްޓްރީ ބާތިކުރުމާ ގުޅިގެން ޖޫންމަހުގެ 2 ވަނަ ދުވަހު ގެޒެޓްގައި އާއްމުކޮށްފައިވާ ލިސްޓްގައިވާ ފަރާތްތަކަށް އައު ބަންޑާރަ ގޯތީގެ ރަޖިސްޓްރީ އާއި ގޯތީގެ އެއްބަސްވުން ދޫކުރުމަށް މިއަދުން ފެށިގެން އެޕޮއިންޓްމަންޓަށް އެދެވޭނޭކަމަށެވެ.

އެޕޮއިންޓްމަންޓް ދޫކުރުމަށް ހަމަޖެހިފައިވަނީ މިއަދުން ފެށިގެން ހިޔާވަހި ޕޯޓަލް މެދުވެރިކޮށެވެ. ހައުސިން މިނިސްޓްރީން ބުނީ ކޮންމެ ގަޑިއަކަށްވެސް އެޕޮއިންޓްމަންޓަށް އެދި ހުށަހެޅުމުގެ ފުރުސަތު ލިބޭނީ ކަނޑައެޅިފައިވާ ވަކި އަދަދެއްގެ ފަރާތްތަކަށް ކަމަށެވެ. ބަންޑާރަ ގޯތީގެ ރަޖިސްޓްރީ އާއި އެއްބަސްވުން ދޫކުރުމަށް ނިންމާފައިވަނީ، މިހިނގާ ޖުލައިމަހުގެ 7 ވާ ހޯމަދުވަހުގެ ހެނދުނު 9:30 އިން ފެށިގެންނެވެ.

- ހެކިވެރިއެއްގެ ގޮތުގައި ސޮއިކުރުމަށް ހާޒިރުވާނެ އެކެއްގެ އައިޑީކާޑު

- ގޯތިލިބޭ ފަރާތް ނޫން އެހެން ފަރާތެއް ހާޒިރުވާނަމަ ޕަވާއޮފް އެޓާނީ އާއި އައިޑީކާޑު ކޮޕީ

- މިނިސްޓްރީ އާއި ގޯތި ލިބޭ ފަރާތާ ދެމެދު ކުރިން ސޮއިކޮށްފައިވާ "ބަންޑާރަ ގޯތި ދޫކުރުމުގެ އެއްބަސްވުމުގެ ކޮޕީ

- މިނިސްޓްރީން ގޯތި ލިބޭ ފަރާތަށް ކުރިން ދޫކުރި ބަންޑާރަ ގޯތީގެ ރަޖިސްޓްރީގެ ކޮޕީ

ގުޅީފަޅުން ގޯތި ދޫކުރުން މިހާތަނަށް ލަސްވެފައިވަނީ، ތިލަމާލެ ބްރިޖު މަޝްރޫއަށް ގުޅިފަޅު ބޭނުންކުރަމުންދިއުމާއި، ގުޅީފަޅުގެ ލޭންޑް ޔޫސް ޕްލޭނަށް އައި ބަދަލާ ގުޅިގެން ކުރިން ގޯތިތައް ދޫކުރި ތަންތަން ތަރުތީބުކުރަން ޖެހުމުންނެވެ. ގުޅީފަޅުން ގޯތި ދިނުމަށް 150 ހެކްޓަރުގެ ބިން ހިއްކާފައިވާއިރު، އެތަނުން 3،520 ގޯތި ދޫކުރުމަށް ނިންމާފައިވާކަމަށް ސަރުކާރުން ވަނީ ބުނެފައެވެ.