ފާއިތުވި ދެ އަހަރާއި ބައިގެ ތެރޭގައި 1.5 ބިލިއަން ރުފިޔާގެ މަސްތުވާތަކެތި ހޯދާފައިވާ ކަމަށާ، މިއީ ކުރީގެ ސަރުކާރުތަކާ އަޅާ ބަލާއިރު ރިކޯޑް އަދަދެއް ކަމަށް ހޯމް މިނިސްޓަރު ޢަލީ އިހްސާން ވިދާޅުވެއްޖެއެވެ.
ރޭ ކުރިއަށް ދިޔަ ވަޒީރުންގެ ”އަހާ“ ފޯރަމް ގައި ވާހަކަދައްކަވަމުން އިހްސާން ވިދާޅުވީ، މަސްތުވާތަކެތީގެ ވިޔަފާރީގެ މައްސަލަ ހައްލު ކުރުމަށް ކުރެވެމުންދާ މަސައްކަތުގެ ދަށުން، ފާއިތުވި ގާތްގަނޑަކަށް ދެ އަހަރާ ބައިގެ ތެރޭގައި 1.3 ޓަނުގެ މަސްތުވާތަކެތި ރާއްޖޭގެ މަގުތަކުން ނަގާފައިވާ ކަމަށެވެ.
”އެއީ ދިވެހި ރުފިޔާއިން ކިޔާ ނަމަ، އޭގެ މަގުމަތީ އަގަކީ 1.5 ބިލިއަން ދިވެހި ރުފިޔާ. މިއީ މި ފާއިތުވި ތިން އަހަރަށް ބަލާއިރު، އޭގެ ކުރީގެ ހުރިހާ ސަރުކާރެއްގެ ފުރަތަމަ ތިން އަހަރާ ބަލާއިރު ރެކޯޑް އަދަދެއް.“ އިހްސާން ވިދާޅުވިއެވެ.
ރޭގެ އަހާ ފޯރަމްގެ ތެރެއިން- ފޮޓޯ/ ވޮއިސް
މީގެ އިތުރުން، ޑްރަގް ކެފޭގެ މައްސަލައަށް އަލިއަޅުވާ ލައްވައި ވާހަކަދައްކަވަމުން އިހްސާން ވިދާޅުވީ، ޑްރަގުގެ މައްސަލަ ހައްލުކުރުމަށް ކުރަމުންދާ މަސައްކަތަށް ގޮންޖެހުމަކަށް ވެފައި އޮތް އެއް ކަމަކީ ޑްރަގު ކެފޭގެ ގޮތުގައި ބޭނުންކުރަމުންދާ ތަންތަން ރެއިޑްކޮށް ބަންދު ކުރުމުންވެސް ތަކުރާރުކޮށް އެތަންތަނުގައި ޑްރަގުގައި ވިޔަފާރި ހިންގުން ކަމަށެވެ.
މިކަން އެބަދޭ ވަރަށް ފުޅާ ދާއިރާއެއްގައި ކުރަމުން. މިކަމަށް ހައްލު ހޯދުމަށް ވަރަށް ފްރިކުއެއްޓްކޮށް އެތަންތަން އެބަ ރެއިޑްކުރަން. އެބަހުރި އެއްގެއަށް ގާތްގަނޑަކަށް 140 އަށްވުރެ ގިނަ ފަހަރު، މިދިޔަ ދެ އަހަރާއި ބައިގައި ރެއިޑްކޮށްފައި.
ޢަލީ އިހްސާން
އެ މައްސަލަ ހައްލުކުރުމަށް އެފަދަ ތަންތަން ކޯޓް އަމުރެއްގެ ދަށުން ބަންދު ކުރަމުންދާ ކަމަށާ، އެގޮތުން ބަންދު ކުރުމުންވެސް އެކަން ކުރާ ނަމަ އެތަންތަން ދައުލަތަށް ނެގޭ ގޮތަށް ގާނޫނަށް ބަދަލު ގެނެސްފައިވާ ކަމަށް އިހްސާން ވިދާޅުވިއެވެ.
އެގޮތުން މިހާރު ވާނެ 17 ތަނެއް ބަންދުކުރުވާފައި. މި ފާއިތުވި ތިން ހަތަރު މަސްތެރޭގައި 17 ތަނެއް. އެއީ އައްޑު އަތޮޅުގެ 4 ތަނާ، ފުވައްމުލަކުގެ 1 ތަނާ، މާލޭގެ 12 ތަން.
ޢަލީ އިހްސާން
އިހްސާން ވިދާޅުވީ، މި އަހަރުގެ ނޮވެންބަރު މަސް ފެށެންވާއިރަށް މާލެ ސަރަހައްދުގައި ޑްރަގް ކެފޭގެ ގޮތުގައި އާއްމުކޮށް ބޭނުންކުރާ ހުރިހާ ތަނެއްވެސް ބަންދުކުރުމަށް މަސައްކަތް ކުރައްވަމުންދާ ކަމަށެވެ.
ރޭގެ އަހާ ފޯރަމްގެ ތެރެއިން- ފޮޓޯ/ ވޮއިސް
މަސްތުވާތަކެތި ބޭނުންކުރުމުގެ ފުރުޞަތު ފަހިކޮށްދޭ ތަންތަން ބަންދުކުރުމުގެ ބާރު ފުލުހުންނާއި ކޯޓުތަކަށް ލިބިދޭ ގޮތަށް، މަސްތުވާތަކެއްޗާ ބެހޭ ޤާނޫނަށް ގެނައި އިޞްލާޙުތަކަށް 7 މާރިޗު 2026 އިން ފެށިގެން ފެށިގެންނެވެ.
މި ގެނެވުނު އިޞްލާޙުގެ ދަށުން، މަސްތުވާތަކެތި ބޭނުންކުރާ ކަމަށް ޝައްކުކުރެވޭ ތަންތަން 24 ގަޑިއިރުގެ މުއްދަތަށް ބަންދުކުރުމުގެ ނޯޓިސް ދިނުމުގެ އިޚްތިޔާރު ފުލުހުންނަށް ވަނީ ދީފައެވެ. އަދި އެފަދަ ތަންތަން އެންމެ ގިނަވެގެން ތިން މަސް ދުވަހުގެ މުއްދަތަށް ބަންދުކޮށްފައި ބެހެއްޓުމުގެ އަމުރު ނެރުމުގެ ޤާނޫނީ ބާރު ކޯޓުތަކަށް މިހާރު ވަނީ ލިބިދީފައެވެ.
ޤާނޫނުގައިވާ ގޮތުން މަސްތުވާތަކެތި ބޭނުންކުރުމަށް ތަނެއް ދެއްކުމާއި އެފަދަ ޚިދުމަތެއް ފޯރުކޮށްދިނުމަކީ ޖިނާއީ ބޮޑު ކުށެކެވެ. އެފަދަ ކުށެއް ސާބިތުވެއްޖެނަމަ 5 އަހަރު ދުވަހުގެ ޖަލު ޙުކުމެއް އައުމާއެކު، 100,000 (އެއްލައްކަ) ރުފިޔާއާ ހަމައަށް ޖޫރިމަނާ ކުރެވޭނެއެވެ. މީގެއިތުރުން، އެ ތަނަކީ މަސްތުވާތަކެތި ބޭނުންކުރުމަށް ބޭނުންކުރާ ތަނެއްކަން އެނގިހުރެ އެކަމަށް ހުއްދަދިނުމާއި އެކަން ހުއްޓުވަން މަސައްކަތް ނުކުރުމަކީ ވެސް، އެ ތަނެއްގެ ވެރިފަރާތާއި، ކުއްޔަށް ހިފާފައިވާ ފަރާތް ނުވަތަ އެ ތަނެއް ބެލެހެއްޓުމާ ޙަވާލުވެހުރި ފަރާތަކުން ކުރާ ޤާނޫނީ ކުށެއް ކަމުގައި ވަނީ ކަނޑައަޅާފައެވެ.
ކޯޓު އަމުރެއްގެ ދަށުން ބަންދުކޮށްފައި ހުންނަ މުއްދަތުގައި، އެއްވެސް ހުއްދައަކާ ނުލައި އެފަދަ ތަންތަނަށް ވަދެނިކުމެ ހެދުމަކީ މަނާކަމެކެވެ. އަދި ބަންދުކޮށްފައިވާ ތަންތަނަށް ހުއްދަނެތި ވަންނަ ފަރާތްތަކަށާއި، އެ ތަންތަނަށް އެކި ގޮތްގޮތުން ގެއްލުންދޭ ފަރާތްތަކާ ދެކޮޅަށް ޤާނޫނުގައިވާ އެންމެ ހަރުކަށި ފިޔަވަޅު އަޅަމުން ގެންދާނެ ކަމަށް ވެސް ފުލުހުން ބުނެއެވެ.
Advertisement
This content is created and paid for by advertisers and does not involve Voice Journalists
