ދުންފަތުގެ ބާވަތްތައް އެތެރެކޮށް ވިއްކާ ފަރާތްތަކުން ނަގަންޖެހޭ ހާއްސަ ލައިސެންސް ނެގޭނެ އެންމެ ފަހުގެ ތާރީހަކީ މި މަހުގެ 17 ވަނަ ދުވަސް ކަމަށް ހެލްތް ޕްރޮޓެކްޝަން އެޖެންސީ (އެޗް.ޕީ.އޭ) އިން ބުނެފިއެވެ.

ދުންފަތުގެ ބާވަތްތަށް އިމްޕޯޓްކުރުމަށާއި، ރީ އެކްސްޕޯޓްކުރުމަށާއި، އަދި ރާއްޖޭގައި ވިއްކުމުގެ ގާނޫނު (ދުންފަތް ކޮންޓްރޯލް ކުރުމާބެހޭ ގާނޫނު، ގާނޫނު ނަމްބަރު 15/2010)  އަދި އެ ގާނޫނުގެ ދަށުން އާންމު ކޮށްފައިވާ "ދުންފަތް ކޮންޓްރޯލް ކުރުމާ ގުޅޭ އާންމު ގަވާއިދު" (ނަމްބަރު: 2025/R-21) ގައި ބަޔާންކޮށްފައިވާ ގޮތުގައި ދުންފަތުގެ ވިޔަފާރިކުރުމަށް ހާއްސަ ލައިސެންސް އެއް ނަގަންޖެހޭނެއެވެ.

އެޗް.ޕީ.އޭ އިން ބުނެފައިވާ ގޮތުގައި ދުންފަތުގެ ބާވަތްތަކުން ވިޔަފާރިކުރުމަށް ނަގަންޖެހޭ ލައިސެންސް ނެގުމަށް ބޭނުންވާ ފަރާތްތަކުން OneGov ޕޯޓަލް މެދުވެރިކޮށް ލައިސެންސް ނެގުމުގެ ފުރުސަތު މި އަހަރުގެ އޭޕްރީލް މަހުގެ 17 ވަނަ ދުވަހުން ފެށިގެން ހުޅުވާލާފައިވާކަމަށާއި މި ލައިސެންސް ނެގުމުގެ މުއްދަތު ތިން މަސްދުވަހުގެ ތެރޭގައި ހަމަވާނެކަމަށެވެ. އެ ގޮތުން މި މުއްދަތު ހަމަވާ ތާރީހަކީ މި މަހުގެ 17 ވަނަ ދުވަހެވެ.

އެ ގޮތުން މި މަހުގެ 17 ވަނަ ދުވަހަށްފަހު ލައިސެންސް ނެތި ދުންފަތުގެ ވިޔަފާރީގެ މުޢާމަލާތްތައް ކުރުމަކީ ގާނޫނީ ގޮތުން މަނާކަމެއްކަމަށާއި ގާނޫނު ލާޒިމުކުރާ ލައިސެންސް ނެގުމަށް ހުރިހާ ފަރާތްތަކަށް އެޗް.ޕީ.އޭ އިން ވަނީ ހަނދާންކޮށްދީފައެވެ.