ވިލުފުށީގައި އިއްޔެ ހެނދުނު ހިނގި އަލިފާނުގެ ހާދިސާގައި ފިހުނު 2 މީހުންގެ ތެރެއިން ދިވެހި މީހާއަށް ފަރުވާ ދެމުން ދަނީ އައިސީޔޫގައި ކަމަށް ސަރުކާރުގެ މައި ހޮސްޕިޓަލް -- އައިޖީއެމްއެޗުން ބުނެފި އެވެ.
އިއްޔެގެ ހާދިސާގައި ވިލުފުށީ ބަނދަރުގައި އޮތް ދެ ދޯންޏެއްގައި ވަނީ އަލިފާން ރޯވެ އަނދާފަ އެވެ. އެ ހާދިސާގައި ދޯނިތަކުގެ ވެރިމީހާއާ ބިދޭސީ އަކު ފިހިފައިވެ އެވެ. ދޯނީގެ ވެރިމީހާ, މަހުމޫދު މުހައްމަދުގެ ހަށިގަނޑުން 35 އިންސައްތަ ވަނީ ވަރަށް ބޮޑަށް ފިހިފަ އެވެ.
އިތުރު ފަރުވާއަށް މާލެ ގެނެސް މަހްމޫދަށް މިހާރު ފަރުވާ ދެނީ އައިޖީއެެމްއެޗްގަ އެވެ. އެ ހޮސްޕިޓަލުން ބުނީ މަހްމޫދަށް ފަރުވާ ދެނީ އައިސީޔޫގައި ކަމަށާ ހާލު ސީރިއަސް ކަމަށެވެ.
މި ހާދިސާގައި ބިދޭސީ މީހާއަށް ވެސް ވަނީ އެކިވަރުގެ އަނިޔާތައް ލިބިފައެވެ. އެގޮތުން އޭނާގެ މޫނުމަތީގެ ބައެއް ފިހިފައިވާއިރު ދޯނިން ފުންމާލަން އުޅުމުގެ ތެރޭގައި ބޯވެސް ވަނީ ފަޅައިގެން ގޮސްފައެވެ. ބޯޓުގައި އަލިފާން ރޯވި ސަބަބެއް އަދި ސާފެއް ނުވެއެވެ.
ވޮއިސްއަށް މައުލޫމާތު ލިބިފައިވާ ގޮތުގައި މިދިޔަ އަހަރުގެ ތެރޭގައިވެސް، ވިލުފުށީގައި ވަނީ މިފަދަ ހާދިސާއެއް ހިނގާފައެވެ. އެފަހަރު ހިނގި އަލިފާނުގެ ހާދިސާގައިވެސް ގެއްލުންވެފައިވަނީ މިއަދު ހިނގި ހާދިސާގައި އަނދައިގެންދިޔަ ބޯޓުތަކުގެ ވެރިފަރާތުގެ އުޅަނދަކަށް ކަމަށް މައުލޫމާތު ލިބެއެވެ.
Advertisement
This content is created and paid for by advertisers and does not involve Voice Journalists
