ބަންގްލަދޭޝްގެ ކުރީގެ ބޮޑުވަޒީރު، ޝެއިޚް ޙަސީނާ، ކޯޓުގެ ޙުރުމަތް ކަނޑާލި ކަމުގެ ދައުވާ ސާބިތުވެ، އެ ގައުމުގެ އިންޓަރނޭޝަނަލް ކްރައިމްސް ޓްރައިބިއުނަލްއިން ހަ މަސް ދުވަހުގެ ޖަލު ޙުކުމެއް ކޮށްފިއެވެ.
ބޮޑު ވަޒީރު ކަމުގެ މަގާމުން އިސްތިއުފާ ދީ އަމިއްލައަށް އަރުވާލެވިގެން ހުންނަވަނިކޮށް، މިދިޔަ ބުދަ ދުވަހު، މި ޙުކުމް އިއްވާފައިވަނީ ޝެއިޚް ޙަސީނާގެ ޣައިރު ޙާޒިރުގައެވެ.
މިދިޔަ އޮގަސްޓް މަހު ބަންގްލަދޭޝްގެ ދަރިވަރުން ތަކެއް ކުރިއަށް ގެންދިޔަ ބޮޑު މުޒާހަރާތަކަށްފަހު ފިއްލަވައިގެން އިންޑިޔާއަށް ވަޑައިގެންނެވިފަހުން ޙަސީނާއާ ދެކޮޅަށް ގިނަ އަދަދެއްގެ މައްސަލަތަކެ ކޯޓުގައި ހިނގަމުންދާއިރު، މިއީ ބަންގްލަދޭޝްގެ ކުރީގެ ވެރިޔަކާ ދެކޮޅަށް ޖަލު ޙުކުމެއް ކުރި ފުރަތަމަ ފަހަރެވެ.
ޗީފް ޕްރޮސިކިއުޓަރ މުޙައްމަދު ތާޖުލް އިސްލާމް ނޫސްވެރިންނަށް ވިދާޅުވި ގޮތުގައި، މި މައްސަލައިގައި ޙަސީނާގެ ޕާޓީ، އަވާމީ ލީގުގެ ލީޑަރެއް ކަމަށްވާ ޝަކީލް އަކަންދް ބުލްބުލްއަށް ވެސް ދެ މަސް ދުވަހުގެ ޖަލު ޙުކުމެއް ވަނީ ކޮށްފައެވެ.
ހަސީނާ އާއި ޝަކީލްގެ މައްޗަށް އިއްވާފައިވާ މި ޙުކުމްތައް ތަންފީޒުވާނީ ހައްޔަރުކުރުމުން ނުވަތަ ކޯޓަށް ހާޒިރުވުމުން ކަމަށް ޕްރޮސިކިއުޓަރ ވަނީ ވިދާޅުވެފައެވެ.
ބަންގްލަދޭޝްގެ މީޑިއާތައް ރިޕޯޓްކޮށްފައިވާ ގޮތުން، ކޯޓުގެ ޙުރުމަތް ކަނޑާލުމުގެ ދައުވާ ހަސީނާގެ މައްޗަށް އުފުލާފައިވަނީ، ލީކުވެފައިވާ ފޯނު ރެކޯޑިންގއަކާ ގުޅިގެންނެވެ. އެ ރެކޯޑިންގައި ޙަސީނާ ކަމަށް ތުހުމަތުވާ މީހަކު ވަނީ، އޭނާއާ ”ދެކޮޅަށް 227 މައްސަލަ އެބަހުރި، އެހެންކަމުން މިހާރު 227 މީހުން މަރާލުމުގެ ލައިސަންސެއް އަހަންނަށް ލިބިފައި"ވާ ކަމަށެވެ.
Advertisement
This content is created and paid for by advertisers and does not involve Voice Journalists
