ދ.ކުޑަހުވަދޫގެ މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތް ބާރު ސްޕީޑްގައި ކުރިއަށްދާ ކަަމަށް ރޯޑް ޑިވެލޮޕްމަންޓް ކޯޕަރޭޝަން އާރު.ޑީ.ސީއިން ބުނެފިއެވެ.

އެގޮތުން އާރު.ޑީ.ސީއިން ވަނީ ކުޑަހުވަދޫގެ މަގުތައް ތަރައްޤީކުރުމުގެ ގޮތުން ކުރަމުންގެންދާ މަސައްކަތުގެ އެންމެ ފަހުގެ މައުލޫމާތު އެކްސްގައި ހިއްސާކޮށްފައެވެ. އެގޮތުން މިހާރު ކުރިއަށްދާ މަސައްކަތްތަކަކީ އެރަށު އާކުރި މަގުގައި ސްޓޯރމް ވޯޓަރ ޖަންކްޝަން ބެހެއްޓުމާއި ކޭބަލް ޖަންކްޝަން ހޮޅި އެޅުމުގެ މަސައްކަތްކަމަށް އެކުންފުނިންވަނީ ހާމަކޮށްފައެވެ. މީގެ އިތުރުން އެރަށު މޫނިމާ މަގުގައި ކާރބް ސްޓޯން ޖެހުމުގެ މަސައްކަތް ވެސް ކުރަމުން އަންނަކަމަށް އެކުންފުނިން ވަނީ ބުނެފައެވެ.

މި މަޝްރޫއުގެ ދަށުން ކުޑަހުވަދޫގެ 5.85 ކިލޯމީޓަރުގެ މަގުގައި ތަރުއެޅުމަށް ހަމަޖެހިފައިވާއިރު، މަގުތަކުގައި ފެންހިންދާ ނިޒާމް ޤާއިމްކުރުމާއި މަގުބައްތި ޖެހުމަށްވެސް ވަނީ ހަމަޖެހިފައެވެ. މި މަޝްރޫއު 445 ދުވަހުގެ ތެރޭގައި ނިންމުމަށް ވަނީ ހަމަޖެހިފައެވެ.

އާރު.ޑީ.ސީއިން ބުނާގޮތުގައި މި މަޝްރޫއުގެ ޖުމުލަ އަގަކީ 122 މިލިޔަން ރުފިޔާއެވެ.

ކުޑަހުވަދޫ މަގުހެދުމުގެ މަޝްރޫއުގެ ފުރުތަމަ ފިޔަވަހީގެ ދަށުން 2015 ވަނަ އަހަރު ވަނީ އެރަށު 13 މަގެއްގައި ރާރުއަޅައި ޒަމާނީ ފެންވަރަށް ތަރައްގީކޮށްފައެވެ.