އާމްދަނީ އިތުރުކޮށް، ޚަރަދުކުޑަކުރުމަށް އިތުރު ގޮތްތަކެއް ހޯދަން މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން، އެމްއެމްޕީއާރުސީއަށް އެންގުމަށް ރައްޔިތުންގެ މަޖިލީހުން ފާސްކޮށްފިއެވެ.

އެމްއެމްޕީއާރުސީ އާއި މޯލްޑިވްސް އިންޓަގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން، އެމްއައިޓީޑީސީގެ ޙާލަތު މަޖިލީހުގެ އެސްއޯއީ ކޮމިޓީން ދިރާސާކޮށް ނިންމިގޮތުގެ ރިޕޯޓަށް ބަހުސް ކުރުމަށްފަހު މިއަދުގެ ޖަލްސާގައި އެއަށް ވޯޓަށް އަހާފައިވާއިރު، މި ރިޕޯޓް ފާސްކުރުމަށް 62 މެންބަރުން ވަނީ ވޯޓު ދެއްވާފައެވެ. 

އެމްއެމްޕީއާރްސީއާއި މޯލްޑިވްސް އިންޓަގްރޭޓަޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ)ގެ ހާލަތު ދިރާސާކުރުމަށްފަހު ކޮމިޓީން މިދިޔަ އާދިއްތަ ދުވަަހު ނެރުނު ރިޕޯޓުގައިވަނީ އެމްއެމްޕީއާރްސީގެ ގިއަރިން ރޭޝިއޯތައް ކަމުގައިވާ ޑެޓް ޓު އިކުއިޓީ ރޭޝިއޯއާއި ޑެޓް ޓު ޓޯޓަލް ކެޕިޓަލް ރޭޝިއޯ ހުރީ މައިނަސް ޢަދަދުތަކެއްގައި ކަމަށެވެ.

އަދި އަދަދުތައް މައިނަސްގައި ހުރުމުން ކުންފުނި ބަނގުރޫޓުވުމުގެ ނުރައްކާ އޮތްކަން އަންގައިދޭ ކަމަށާ ކުންފުނީގެ މާލީ ޙާލަތު ރަނގަޅުކުރަން ޖެހޭކަން އަންގައިދޭ ކަމެއް ކަމަށް ވެސް ރިޕޯޓްގައި ފާހަގަކޮށްފައިވެއެވެ.

މީގެ އިތުރުން، އެމްއައިޓީޑީސީއަކީ ދައުލަތުގެ ބަޖެޓުން, ބޮޑު ޚަރަދެއް ކުރަންޖެހޭ ކުންފުންޏެއް ކަމަށްވާއިރު، އެއީ ފެށުނީއްސުރެވެސް ގޯސްކޮށް ހިންގަމުން އަންނަ ކުންފުންޏެއް ކަމަށް ރިޕޯޓްގައިވެއެވެ. އެހެންވެ އެ ކުންފުނި އުވާލުމަކީ ސަރުކާރު ހިއްސާވާ ކުންފުނިތައް ރިފޯމްކުރުމާއި ފިސްކަލް ރިފޯމާ ވެސް ގުޅޭ މުހިންމު ނިންމުމެއްކަމަށް ރިޕޯޓުގައިވެއެވެ.

ހަމައެހެންމެ، އެމްއެމްޕީއާރްސީއަކީ އަމިއްލަ ފުދުންތެރިކަން ހުރި ކުންފުންޏަކަށް ހެދުމަށް އާމްދަނީ އިތުރުކުރެވޭނެ ގޮތްތައް ބަލައި ދިރާސާ ކުރުމަށް އަންގައި، ކުންފުނީގެ ޚަރަދުތައް ކުޑަކުރުމަށް އިތުރު ގޮތްތަކެއް ހޯދުމަށް އެމްއެމްޕީއާރުސީއަށް އެންގުމަށް ކޮމިޓީން ވަނީ ފާސްކޮށްފައެވެ. 

އަދި، އެމްއައިޓީޑީސީ އުވާލުމަށް ކުންފުނީގެ ޤާނޫނާ އެއްގޮތަށް ކުންފުންޏަށް ލިބެންޖެހޭ ފައިސާ ހޯދުމަށާއި ސައްޙަ ދަރަނިތައް އަދާކޮށް، ޤާނޫނުގައި ބަޔާންކުރާ އެހެން ކަންކަން ފުރިހަމަކުރުމަށް މާލީވުޒާރާއަށް އަންގައި އެކަންކަން ފުރިހަމަ ކުރުމަށްފަހު ސަަރުކާރުގެ ނިންމުމާ އެއްގޮތަށް އެމްއައިޓީޑީސީ އުވާލުމުގެ މަރުހަލާ ކުރިއަށްގެންދިއުމަށް އަންގަންވެސް ވަނީ ފާސްކޮށްފައެވެ.

މިދިޔަ ޖޫންމަހު އޮޑިޓަރ ޖެނެރަލް ނެރުއްވި 2024 އަހަރުގެ އެމްއެމްޕީއާރުސީގެ ރިޕޯޓްގައި އެކުންފުނީގެ ޖުމްލަ ދަރަނި 1.5 ބިލިއަން ރުފިޔާއަށްވުރެ ބޮޑެވެ. އެގޮތުން އެމްއެމްޕީއާރުސީން 2013 ވަނަ އަހަރާއި 2015 ވަނަ އަހަރާ ދެމެދު ރިސޯޓް ހެދުމަށް ފަޅުރަށްތައް ވިއްކައިގެން ލިބުނު ފައިސާއިން ޓޫރިޒަމް މިނިސްޓްރީއަށް މިހާރުވެސް ދޭންޖެހޭ އަދަދު 1.5 ބިލިއަން ރުފިޔާއަށްވުރެ ބޮޑެވެ. މީގެ އިތުރުން އެމްޕީއެލުން 2020 ވަނަ އަހަރު ނެގި 85 މިލިއަން މިލިއަން ރުފިޔާގެ ލޯނު އޮތްއިރު، އެ ލޯނުގެ އިންޓްރެސްޓް ރޭޓް އުޅެނީ އަހަރަކަށް 4.60 އިންސައްތައިގެ ރޭޓްގައެވެ.