ވާރޭވެހޭތީ އިސްލާމީ މަރުކަޒުގައި ބާލިދީ ބަހައްޓާފައި
ރާއްޖޭގައި ހުރި އެންމެ ރީތި އަދި އެންމެ ބޮޑު އެއް މިސްކިތް -- މަސްޖިދުއްސުލްތާން މުހައްމަދު ތަކުރުފާނުލް އައުޒަމަށް ވާރޭވެހޭތީ މިއަދު ބާލިދީ ބަހައްޓައިފި އެވެ.
މިއަދަކީ މުޅި ރާއްޖެއަށް ވަރަށް މޫސުން ގޯސް ދުވަހެކެވެ. ވެރިރަށް މާލެއަށް ވެސް މޫސުން ވަރަށް ގޯހެވެ. ދޭތެރެ ދޭތެރެއިން ވަރަށް ބޯކޮށް ދަނީ ވާރޭވެހުމުންނެވެ.
ބޯކޮށް ވާރޭވެހުމުގެ ސަބަބުން އިސްލާމީ މަރުކަޒުގެ މިސްކިތް ބަޔަށް ވެސް ވަނީ ވާރޭވެހިފަ އެވެ. ވާރޭތިކިތިކި ޖަހާތީ މިސްކިތުގެ އެކި ސަރަހައްދުތަކުގައި ވަނީ ބާލިދީ ބަހައްޓާފަ އެވެ. އެ ގޮތުން މިސްކިތުގެ ޖުމްހޫރީ މައިދާނާއިވީ ފަޅީގެ އެކި ސަރަހައްދުގައި ބާލިދީ ބަހައްޓާފައިވެ އެވެ.
އެކަމާއި ގުޅޭގޮތުން އިސްލާމިކް މިނިސްޓްރީއާ ސުވާލުކުރުމުން އެކަން ބަލާލުމަށް ފަހު ޖަވާބެއް ދޭނެ ކަމަށް ބުންޏެވެ.
އިސްލާމީ މަރުކަޒަކީ މީގެ 40 އަހަރު ކުރީން ކުރީގެ ރައީސް މައުމޫންގެ ވެރިކަމުގައި ބިނާކޮށްފައިވާ ތަނެކެވެ. އެ މަރުކަޒަކީ އަދިވެސް ރާއްޖޭގައި ހުރި އެންމެ ރީތި މަރުކަޒެވެ. މަރުކަޒުގައިވާ މިސްކިތަކީ ރާއްޖޭގައިވާ އެންމެ ރީތި އެއް މިސްކިތެވެ. އިސްލާމިކް މިނިސްޓްރީ ވެސް ހިންގަނީ މަރުކަޒުގަ އެވެ.
އެ މިސްކިތް ރަނގަޅަށް ނުބަލަހައްޓާ ކަމުގެ ޝަކުވާ ބޮޑެވެ.
Advertisement
This content is created and paid for by advertisers and does not involve Voice Journalists
