ޤަވާއިދާހިލާފަށް އުޅެމުންދާ ބިދޭސީން ހޯދުމަށް ފަށާފައިވާ އޮޕަރޭޝަނުގެ ދަށުން މިހާތަނަށް 7،000 ހަށްވުރެ ގިނަ ބިދޭސީން ޑީޕޯޓްކޮށްފައިވާކަމަށް މޯލްޑިވްސް އިމިގްރޭޝަނުން ބުނެފިއެވެ.

އިމިގްރޭޝަނުން ވަނީ ސަރުކާރުގެ ކަމާބެހޭ އިދާރާތަކާ ގުޅިގެން ރާއްޖޭގައި ގަވާއިދާ ހިލާފަށް މަސައްކަތްކުރަމުންގެންދާ ބިދޭސީން ހޯދުމުގެ އޮޕަރޭޝަނެއް ފަށާފައެވެ. މި އޮޕަރޭޝަނުގެ ދަށުން މިހާތަނަށް 151،694 ބިދޭސީންގެ މައުލޫމާތު މިހާތަނަށް އެއްކުރެވިފައިވާއިރު، ގަވާއިދާހިލާފަށް ވިޔަފާރިކޮށް އަދި ވަރކް ވިސާއާ ހިލާފަށް އުޅޭކަމަށް ފާހަގަކުރެވިގެން ގިނަ އަދަދެއްގެ ބިދޭސީން ވަނީ ފޮނުވާވެސްލާފައެވެ. 

އިމިގްރޭޝަނުން ބުނީ އެންމެފަހުން އިއްޔެ ހަވީރު މާލޭގައި ކުރިއަށްގެްނދިޔަ އޮޕަރޭޝަނެއްގައި ކެފޭއެއް ބަލައި ފާސްކޮށް، އެތަނުން ޖުމުލަ 09 ފަރާތެއް ޗެކްކޮށްފައިވާކަމަށެވެ. އެގޮތުން ގަވާއިދާ ހިލާފަށް އުޅެމުންދިޔަ 01 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެނެސްފައިވާކަމަށް ވަނީ ބުނެފައެވެ.

ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމުގެ ގޮތުން އިމިގްރޭޝަނުން ފަށާފައިވާ މަސައްކަތުގެ ދަށުން އެންމެ ފާހަގަކޮށްލެވެނީ ބިދޭސީންގެ އަދަދާއި އެ މީހުންގެ މައުލޫމާތު އެއްކުރުމަށްޓަކައި އެ މީހުންގެ ބަޔޯމެޓްރިކް ޑޭޓާ ނެގުމަށްޓަކައި ކުރަމުންގެންދާ މަސައްކަތެވެ.

ގަވާއިދާހިލާފަށް އުޅެމުންދާ ބިދޭސީން ހޯދުމުގެ މި އޮޕަރޭޝަން ފަށާފައިވަނީ މިދިޔަ 2024 ވަނަ އަހަރުގެ މެއި މަހުގެ 3 ވަނަ ދުވަހުއެވެ. މި އޮޕަރޭޝަނަކީ ހޯމް މިނިސްޓްރީއާއި ފުލުހުންގެ އިތުރުން އިމިގްރޭޝަނުން ގުޅިގެން ކުރިއަށް ގެންދާ އޮޕަރޭޝަނެކެވެ.

ސަރުކާރުގެ އަމާޒަކީ، ގަވައިދާ ޚިލާފަށް އުޅޭ ބިދޭސީންގެ މައްސަލަ ދައުރުގެ ފުރަތަމަ ތިން އަހަރު ތެރޭގައި ހައްލުކުރުމެވެ.