ރައީސުލްޖުމްހޫރިއްޔާ ރަށަކަށް ވަޑައިގަތުމުން ހަޅޭއްލަވާ ފުރައްސާރަކުރުމަކީ ހިޔާލުފާޅުކުރުމެއް ނޫން: އުމަރު
ރައީސުލްޖުމްހޫރިއްޔާ ރަށަކަށް ވަޑައިގަތުމުން ހަޅޭއްލަވާ ފުރައްސާރަކުރުމަކީ ހިޔާލުފާޅުކުރުން ނޫންކަމަށް ކުރީގެ ދާހިލީ ވަޒީރު އުމަރު ނަސީރު ވިދާޅުވެއްޖެ އެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު އިއްޔެ ނ.ކުޑަފަރީއަށް ކުރެއްވި ދަތުރުފުޅުގައި މަގުމަތިން ހިންގަވާފައި ވަޑައިގަންނަވަނިކޮށް އެމްޑީއޭއަށް ތާއިދުކުރާ އަންހެނަކު ވަނީ ރައީސުލްޖުމްހޫރިއްޔާއަށް ނިސްބަތްކޮށް އަދަބު އިހުތިރާމް ކުޑަވާނެހެން މުހާތަބުކޮށްފައެވެ.
މިކަމާ ގުޅޭގޮތުން އުމަރު ނަސީރު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ އާންމު ތަންތަނުގައި އެއްވެސް މީހަކާ ދިމާއަށް، އަދި ވަކިން ޚާއްސަކޮށް ރައީސުލްޖުމްހޫރިއްޔާ ވަޑައިގަތުމުން އެމަނިކުފާނާދިމާލަށް ހަޅޭއްލަވާ ފުރައްސާރަ ކުރާކުރުން ނިމުމަކަށް ގެންނަން ޖެހޭކަމަށެވެ. އުމަރު ވިދާޅުވީ މިފަދަ އަމަލުތަކަކީ ހިޔާލުފާޅުން ނޫންކަމަށާއި މިއީ ފުރައްސާރަކުރުން ކަމަށެވެ.
މިއީ ޚިޔާލުފާޅުކުރުމެއް ނޫން. މިއީ ފުރައްސާރަކުރުން. އަޅުގަޑުމެންގެ ތެރޭ އަޚުލާގެއް އޮންނަންވާނެ.
އުމަރު ނަސީރު ވިދާޅުވި އެވެ.
ރައީސް ޑރ.މުއިއްޒަށް ކުޑަފަރީން މީހަކު އާއްމު އިޖުތިމާއީ މިންގަނޑާ ހިލާފަށް މުހާތަބްކުރި މައްސަލާގައި ގިނަ ބަޔަކު ދަނީ އެކަމާ ދެކޮޅަށް ވާހަކަދައްކަމުންނެވެ. މިކަމާ ގުޅޭގޮތުން ކުރީގެ ޖަސްޓިސް މިނިސްޓަރު މުހައްމަދު މުއިއްޒު އަދުނާން ވިދާޅުވެފައިވަނީ ޤައުުމުގެ ރައީސުލްޖުމްހޫރިއްޔާއާ މުހާތަބުކޮށް އެމަނިކުފާނުގެ ކުރިފުޅުމަތީގައި އެފަދަ ގޮތަކަށް ކަންކަން ހިނގިޔަދީގެން ނުވާނޭކަމަށާއި، ކޮންމެ ބޭފުޅަކު ރައީސުލްޖުމްހޫރިއްޔާގެ މަޤާމުގައި ހުންނެވިޔަސް އެމަޤާމު ރަމްޒުކޮށްދެނީ ދިވެހި ދައުލަތްކަމަށެވެ.
މިނިވަންކަމަކީ ގޮތްނެތް ކަމެއްނޫންކަން ފާހަގަކުރައްވަމުން ކުރީގެ ޖަސްޓިސް މިނިސްޓަރު ވިދާޅުވީ ޑިމޮކްރަސީ އަކީ ހިތުހުރިހާގޮތަކަށް އުޅުއްމެއްވެސް ނޫންކަމަށެވެ. ސަރުކާރާއި ރައީސްއަށް ފާޑުކިޔޭނޭކަން ފާހަގަކުރައްވަމުން މުއިއްޒުއ އަދުނާން ވިދާޅުވީ ހިޔާލުފާޅުކުރުމުގެ މިނިވަންކަންވެސް އޮންނާނީ ވަކި ހުދޫދެއްގެ ދަށުން ކަމަށެވެ.
Advertisement
This content is created and paid for by advertisers and does not involve Voice Journalists
