ސަލާމަތީ ބާރުތަކަށް އިންވެސްޓްކުރަނީ، ކޮންމެ އަކަ އިންޗިއެއް ބަލަހައްޓަން ޖެހޭނީ އަމިއްލައަށް ކަމަށްވާތީ: ރައީސް
ސިފައިންނާއި ފުލުހުންނަށް އިންވެސްޓްކުރަންޖެހެނީ، ދިވެހިރާއްޖޭގެ ކޮންމެ އަކަ އިންޗިއެއް ބަލަހައްޓަން ޖެހޭނީ އަޅުގަނޑުމެން އަމިއްލައަށް ކަމަށްވާތީ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެ އެވެ.
ރައީސުލްޖުމްހޫރިއްޔާ މިބީދައިން ވިދާޅުވެފައިވަނީ މިނިވަންދުވަހުގެ މުނާސަބާ ފާހަގަކުރުމުގެ ގޮތުން މިއަދު ސިފައިންނާއި ފުލުހުންނާ ބައްދަލުކުރައްވާ ވާހަކަފުޅުދައްކަވަމުންނެވެ. ދިވެހިރާއްޖެއަކީ ފަޚުރުވެރި މިނިވަން ޤައުމެއްކަން ފާހަގަކުރައްވާ ރައީސް ވިދާޅުވީ، ދިވެހި ސިފައިންނާއި ފުލުހުން ޤައުމުގެ ރައްޔިތުން ހިމާޔަތްކުރުމަށް އަބަދުވެސް ތައްޔާރަށް ތިބެންޖެހޭނެކަމަށެވެ.
މިމޭރުމުން ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، ދިވެހިރާއްޖޭގެ ކަންކަން ބަލަހައްޓާނީ ދިވެހިން އަމިއްލައަށް ކަމަށެވެ.
ދިވެހިންގެ ވަށައިގެންވާ ކަނޑުގެ ސަރަޙައްދު ބޮޑުކަން ފާހަގަކުރައްވާ އެމަނިކުފާނު ވިދާޅުވީ، ޚާއްސަ އިޤްތިޞާދީ ސަރަޙައްދު ބޮޑު ޤައުމުތަކުގެ ތެރޭގައި ދިވެހިރާއްޖެ ހިމެނޭ ކަމަށެވެ. އެގޮތުން އީއީޒެޑް އެންމެ ބޮޑު 3 ޤައުމުގެ ތެރޭގައިވެސް ދިވެހިރާއްޖެ ހިމެނޭކަން އެމަނިކުފާނުގެ ވާހަކަފުޅުގައި ވަނީ ފާހަގަކުރައްވާފަ އެވެ.
މިހާ ބޮޑު ސަރަޙައްދަކަށް ފެތުރިފައިވާ ރަށްރަކާއި އަތޮޅުތަށް އޮތް ޤައުމަކަށް ވާއިރު، އަޅުގަނޑުމެންގެ މީސްތަކުންގެ އަދަދު އަދި މިލިއަނުން ގުނާލަން ނުޖެހުނަސް، އަޅުގަނޑުމެންނަކީ ފަޚުރުވެރި މިނިވަން ޤައުމެއް. މި ފަޚުރުވެރި މިނިވަން ޤައުމުގެ ކޮންމެ އަކަ އިންޗިއެއް ބަލަހައްޓާނީ އަޅުގަނޑުމެން އަމިއްލައަށް. އެއީ އަޅުގަނޑު ޤަބޫލުކުރާ ހަމައަކީ. އެހެންވީމަ، ސިފައިންނަށް އެހާބޮޑަށް އަޅުގަނޑުމެން އިންވެސްޓްކުރަނީ. ފުލުހުންނަށް ބޭނުންވާ ކަންކަމުގަ އަޅުގަނޑުމެން އެހާ ބޮޑަށް ސަމާލުކަން ދެނީ
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވި އެވެ.
އެހެންނަމަވެސް، ދިވެހިރާއްޖޭގެ ކަންކަން ބެލެހެއްޓުމުގައި އެހެން ޤައުމުތަކުގެ އެހީތެރިކަން ފަންނީ ގޮތުންނާއި އެހެނިހެން ގޮތްގޮތުން ހޯދަން ޖެހޭ ކަން އެމަނިކުފާނުގެ ވާހަކަފުޅުގައި ވަނީ ފާހަގަކުރައްވާފައެވެ
ސަލާމަތީ ބާރުތަކުގެ ގާބިލްކަން އިތުރުކުރުމަށްޓަކައި ރައީސް ޑރ.މުއިއްޒުގެ ވެރިކަމު މިހާހިސާބަށް އާއިރުވެސް ވަނީ ޚާއްސަ މަސައްކަތްތަކެއް ކޮށްފައިވެއެވެ. އެގޮތުން ދިވެހިރާއްޖޭގެ އިޤުތިޞާދީ ސަރަޙައްދު ބެލެހެއްޓުމުގެ މަސައްކަތް ދިވެހިން އަމިއްލައަށް ކުރުމަށްޓަކައި، އަސްކަރީ ޑްރޯންތަކެއް ވަނީ ގެނެސްފަ އެވެ. އަދި ހަމައެހެންމެ، ދިވެހި ސިފައިންގެ ވައިގެ ޔުނިޓެއްވެސް ވަނީ ގާއިމްކޮށްފައެވެ.
Advertisement
This content is created and paid for by advertisers and does not involve Voice Journalists
