ތައިލެންޑާއި ކެމްބޯޑިއާ ދެޤައުމުގެ ދެމެދުގައި ހިނގަމުން އަންނަ ހަމަނުޖެހުންތަކުގައި މަރުވި މީހުންގެ އަދަދު 32 އަށް އަރައިފި އެވެ.
ކެމްބޯޑިއާގެ މިނިސްޓްރީ އޮފް ނޭޝަނަލް ޑިފެންސްގެ ތަރުޖަމާނު މާލީ ސޮޗެއާޓާ މިއަދު އެޤައުމުގެ ނޫސްވެރިންނަށް މައުލޫމާތު ދެއްވަމުން ވިދާޅުވީ މިފަހުން ބަދަލުކުރި ހަމަލާތަކުގައި އާންމުންގެ 7 މީހަކާއި ސިފައިންގެ 5 މީހަކު މަރުވެފައިވާކަމަށެވެ. އަދި ކެމްބޯޑިއާގެ އާންމުންގެ 50 މީހުންގެ އިތުރުން ސިފައިންގެ 20 އަށް ވުރެ ގިނަ މީހަކަށް އެކިވަރުގެ އަނިޔާވެފައިވާ ކަމަށް ތަރުޖަމާނު ވިދާޅުވި އެވެ.
ތައިލެންޑުން ވަނީ ފާއިތުވި ދެ ދުވަހުގެ ތެރޭގައި ކުޑަކުދިން ހިމެނޭ ގޮތަށް އާންމުންގެ 13 މީހަކު މަރުވެފައިވާ ކަމަށް ރިޕޯޓްކޮށްފަ އެވެ. އަދި ކެމްބޯޑިއާގެ ހަމަލާތަކުގައި ތައިލެންޑުގެ އިތުރު 29 ސިފައިންނާއި އާންމުންގެ 30 މީހަކަށް އެކިވަރުގެ އަނިޔާވެފައިވާކަމަށް ވެސް ވަނީ ރިޕޯޓްކޯށްފަ އެވެ. މިކަމާއި ގުޅިގެން ތައިލެންޑުން ވަނީ ކެމްބޯޑިއާގައި ތިބި އެޤައުމުގެ ރައްޔިތުން ނެރުމުގެ މަސައްކަތް ފަށައިފަ އެވެ. އަދި ކެމްބޯޑިއާއިން ވެސް ވަނީ ތައިލެންޑްގައި ތިބި އެޤައުމުގެ ރައްޔިތުން ނެރުމުގެ މަސައްކަތް ފަށައިފަ އެވެ.
މީގެ ދިހަވަރަކަށް އަހަރު ކުރިން ހިނގި ހަމަނުޖެހުން ބުރާސްފަތި ދުވަހު އަލުން ފެށިފައިވާ އިރު މިކަން ގޯހުން ގޯހަށް ގޮސްފައި މިވަނީ ދެ ޤައުމުގެ ބޯޑަރުގައި ލޭންޑްމައިނެއް ގޮވުމުގެ ސަބަބުން ތައިލެންޑް ސިފައިންގެ ފަސް މީހަކު ޒަޚަމްވުމުގެ ސަބަބުންނެވެ.
Advertisement
This content is created and paid for by advertisers and does not involve Voice Journalists
