ދިވެހިރާއްޖޭގެ މިނިވަން ދުވަސް ފާހަގަކުރަން މިއަދު ބޭއްވި ހަރަކާތުގައި ޝަރަފުވެރި މެހެމާނެއްގެ ގޮތުގައި ބައިވެރިވެ ވަޑައިގަތުމަށްފަހު އިންޑިޔާގެ ބޮޑު ވަޒީރު ނަރެންދުރަ މޯދީ ރާއްޖެއަށް ކުރެއްވި ދަތުރުފުޅު ނިންމަވާލައްވާ އަނބުރާ އިންޑިޔާއަށް ފުރާވަޑައިގެންފި އެވެ.
މޯދީގެ މި ދަތުރުފުޅަކީ ދެ ދުވަހުގެ ދަތުރުފުޅެކެވެ. މޯދީ ރާއްޖެ ވަޑައިގެންފައިވަނީ އިއްޔެ ހެނދުނުގެ ވަގުތުގަ އެވެ.
ރާއްޖެއަށް ކުރެއްވި ދަތުރުފުޅު ނިންމަވާލައްވަމުން މޯދީ އެކްސްގައި ދިވެހި ބަހުން ލިޔުއްވާ ހިއްސާކުރެއްވި ޕޯސްޓެއްގައި ވިދާޅުވެފައި ވަނީ ހިތުގެ އެންމެ ފުންމިނުން ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒަށާއި، ދިވެހި ސަރުކާރުގެ އިތުރުން ދިވެހި ރައްޔިތުން މޯދީއަށް ދެއްވި މެހެމާންދާރީއަށް ޝުކުރު އަދާކުރައްވާފަ އެވެ.
އަދިހަމައެހެންމެ، ރާއްޖޭގެ 60ވަނަ މިނިވަން ދުވަހުގެ މުނާސަބަތުގައި ބައިވެރިވުމަކީ ލިބުނު ވަރަށް ބޮޑު ޝަރަފެއް ކަމަށާއި ރައީސް މުޢިއްޒުއާއެކު ކުރެވުނު މަޝްވަރާތަކާއެކު ދެޤައުމުގެ ގުޅުމަށް ވަރަށް ބޮޑު ހަކަތައެއް އިތުރުވެގެންދާނެ ކަމަށް ވެސް މޯދީގެ ޕޯސްޓްގައި ވިދާޅުވެފައިވެއެވެ.
މި ދަތުރުފުޅުގައި، ރައީސުލްޖުމުހޫރިއްޔާ ޑރ. މުޙައްމަދު މުޢިއްޒާއި، ބޮޑުވަޒީރު ނަރެންދުރަ މޯދީ އާއި ދެ ބޭފުޅުން ބައްދަލުކުރައްވައި މަތީފަންތީގެ މަޝްވަރާތަކެއް ވަނީ ކުރިއަށް ގެންދަވާފަ އެވެ. އަދި ދެ ގައުމުގެ މުހިންމު މައްސަލަތަކާއި ސަރަޙައްދީ މައްސަލަތަކާ ގުޅޭގޮތުން ވަނީ މަޝްވަރާކުރައްވާފަ އެވެ.
އިންޑިއާ އާއި ދިވެހިރާއްޖެއާއި ގުޅިގެން ކުރިއަށްގެންދިޔަ ބައެއް މަޝްރޫއުތައް ވެސް ވަނީ އިފްތިތާހުކޮށް ދެއްވާފަ އެވެ.
Advertisement
This content is created and paid for by advertisers and does not involve Voice Journalists
