މެލޭޝިޔާގެ ބޮޑުވަޒީރު އަންވަރު އިބްރާހީމްގެ އިސްތިޢުފާއަށް ގޮވާލާ އެ ޤައުމުގެ އެއްހާސް ރައްޔިތުންނެއް ކުއާލާ ލަމްޕޫރުގެ މަގުތަކަށް ނިކުމެ މުޒާހަރާ ކުރަން ފަށައިފި އެވެ.
މެލޭޝިޔާގެ ރައްޔިތުން އެ ޤައުމުގެ ބޮޑުވަޒީރު އަންވަރުގެ އިސްތިޢުފާއަށް ގޮވާލައި މަގުމައްޗަށް ނިކުމެ މުޒާހަރާކުރަން ފަށާފައި މިވަނީ، ދިރިއުޅުމުގެ ޚަރަދުތައް ބޮޑުވުމާއި، ވެފައިވާ އެއްވެސް ވަޢުދެއް ނުފުއްދުނު ކަމަށް ބުނެ އެވެ. މި ހަރަކާތް އިންތިޒާމުކޮށްފައި ވަނީ އެ ޤައުމުގެ އިދިކޮޅު ޕާޓީތަކުންނެވެ.
މިއީ 2022 ވަނަ އަހަރު މޭލޭޝިޔާގައި ބޭއްވުނު އިންތިޚާބަށްފަހު އަންވަރު އެ ޤައުމުގެ ބޮޑު ވަޒީރުކަމާއި ހަވާލުވެ ވަޑައިގަތް ފަހުން އެ ޤައުމުގައި ބޭއްވި ފުރަތަމަ އެއްވުމެވެ. މުޒާހަރާގެ ބައިވެރިން ބުނެފައިވާ ގޮތުގައި އަންވަރު މެލޭޝިޔާގެ ބޮޑުވަޒީރު ކަމާ ހަވާލުވެވަޑައިގަތްތާ ތިން އަހަރުވެފައިވާ ކަމަށާއި، އެހެންނަމަވެސް އޭނާ ވެވަޑައިގެންނެވި އެއްވެސް ވަޢުދެއް އަދިވެސް ފުއްދަވާފައި ނުވާކަމަށެވެ.
އަންވަރު މެލޭޝިޔާގެ ބޮޑުވަޒީރުކަމުގެ މަޤާމަށް ކުރިމަތިލައްވާފައިވަނީ "އިސްލާހީ" ޓިކެޓެއްގަ އެވެ. އެ ގޮތުން ބޮޑުވަޒީރު ކަމުގެ މަޤާމާ ހަވާލުވުމުގެ ކުރިން އޭނާ ވަނީ އެ ޤައުމުގެ ބޮއްސުންލައިގެން ގޮސްފައިވާ ސިޔާސީ ނިޒާމުގެ ތެރޭގައި ހިމެނޭ ކޮރަޕްޝަނާއި ނެޕޮޓިޒަމް އަދި ކްރޮނިޒަމްއާ ފަސްޖެހުމެއްނެތި ކުރިމަތިލައްވާނެ ކަމަށް ވަޢުދުވެ ވަޑައިގެންފަ އެވެ.
މެލޭޝިޔާގެ ގިނަ ބަޔަކު ދަނީ އަންވަރުގެ ސިޔާސަތުތަކަށް ފާޑުކިޔަމުންނެވެ. މަޤާމުގެ ބޭނުން ނަހަމަ ގޮތުގައި ހިފައި، ސިޔާސީ ވާދަވެރިންގެ މައްޗަށް ނުޙައްޤުން ދަޢުވާ ކުރަމުންދާ މައްސަލާގައިވެސް އަންވަރަށް ވަނީ ފާޑުކިއުންތައް އަމާޒުވެފައެވެ.
Advertisement
This content is created and paid for by advertisers and does not involve Voice Journalists
