އެމެރިކާގެ ޖައްވީ އިދާރާ ނާސާ އާއި އިންޑިއާގެ ޖައްވީ އިދާރާ އިސްރޯ ގުޅިގެން އިއްޔެ ސެޓެލައިޓެއް އުދުއްސާލައިފިއެވެ.

މޫސުމީ ބަދަލުތައް ދެނެގަތުމަށް ބޭނުންކުރާ 1.5 ބިލިއަން އެމެރިކާ ޑޮލަރުގެ މި ސެޓެލައިޓަކީ ޖައްވީ ވާދަވެރިކަން ބޮޑުވެފައިވާ މިދެގައުމުން ގުޅިގެން އުފެއްދި މިފަދަ ފުރަތަމަ ސެޓެލައިޓެވެ. މި ސެޓެލައިޓްގެ އެހީގައި މޫސުމީ ބަދަލުތަކުގެ އަސަރުތަކާއި ޤުދުރަތީ ކާރިސާތަކާއި ބެހެ އިތުރު މައުލޫމާތު ހޯދޭނެއެވެ.

މި ސެޓެލައިޓް ޖައްވަށް އުދުއްސާލީ އިންޑިއާގެ ސަތިޝް ސަވާން ސްޕޭސް ސެންޓަރުންނެވެ. ނާސާ-އިސްރޯ ސިންތެޓިކް އެޕާޗަރ ރާޑަރ (ނިސާރް) ގެ ނަން ދީފައިވާ މި ސެޓެލައިޓަކީ ދެ ރާޑަރ ފްރިކުއަންސީ ބޭނުންކުރާނެ ފުރަތަމަ ރާޑަރ އިމޭޖިންގ ސެޓެލައިޓެވެ. އެގޮތުން މި ސެޓެލައިޓުގައި ނާސާއިން ފޯރުކޮށްދިން އެލް-ބޭންޑާއި އިސްރޯއިން ތަރައްޤީކުރި އެސް ބޭންޑް ބޭނުންކުރާނެއެވެ. މި ޓެކްނޮލޮޖީތަކާއެކު ދުނިޔޭގެ ބިމުގެ ފަށަލައަށް އަންނަ އެންމެ ކުދިކުދި ބަދަލުތައްވެސް ސެޓެލައިޓަށް ނަގައިގަނެވޭނެއެވެ.

މި ސެޓެލައިޓް ދައުރުކުރަމުންދާނީ ބިމަށްވުރެ 747 ކިލޯމީޓަރު މަތިންނެވެ. އަދި ކޮންމެ 12 ދުވަހަކުން މުޅި ދުނިޔޭގެ ރާޑަރ މެޕެއް ސައިންސްވެރިންނަށް ފޯރުކޮށްދެމުން ދާނެއެވެ.

ސެޓެލައިޓް ޖައްވަށް ފޮނުވާލުމަށްފަހު އިސްރޯގެ ޗެއާމަން ވީ. ނަރަޔަނަން ވިދާޅުވީ މި ސެޓެލައިޓްގެ ފައިދާކުރާނީ ހަމައެކަނި ދެގައުމަށް ނޫންކަމަށާއި، މުޅި ދުނިޔެއަށް އެސެޓަލައިޓްގެ ފައިދާކުރާނެ ކަމަށެވެ.