ކޮންމެހެން ކުރަންޖެހޭ ދަތުރެއް ނޫނީ ނުކުރުމަށް އެމްއެންޑީއެފްގެ އިލްތިމާސެއް
މިދުވަސްވަރު ރާއްޖޭގެ މޫސުން ހުރިގޮތުން ކޮންމެހެން ކުރަންޖެހޭ ދަތުރެއްނޫނީ ނުކުރުމަށް އެމްއެންޑީއެފުން އިލްތިމާސްކޮށްފިއެވެ.
އެމްއެންޑިއެފުން ބުނީ، ރާއްޖެ ސަރަހައްދުގައި ހުޅަނގު މޫސުމުގެ ބާރުގަދަވެ، ކުރިއަށް އޮތް ބުދަ ދުވަހާ ހަމައަށް މޫސުން ގޯސްވާނެކަމަށާއި، ޚާއްޞަކޮށް މުޅި ރާއްޖެއަށް ވިއްސާރަވެ، އާންމު ގޮތެއްގައި ވައި ބާރުވެ ކަނޑުތައް ގަދަވާނެކަމަށް، މޫސުމާ ބެހޭ އިދާރާއިން ލަފާކޮށްފައި ވާތީ، ކަނޑުމަގުން ކޮންމެހެން ކުރަންޖެހޭ ދަތުރުތައް ފިޔަވައި އެހެން ދަތުރުތައް ނުކުރުމަށް އިލްތިމާސްކުރާ ކަމަށެވެ.
މި ދުވަސްވަރަކީ ސްކޫލު ޗުއްޓީ ދުވަސްވަރުކަމުން ގިނަ ބަޔަކު ކަނޑުމަގުން ދަތުރުކުރާނެކަމަށް ލަފާކުރެވޭތީ މޫސުމަށް ޚާއްޞަ ސަމާލުކަމެއް ދިނުމަށް އެމްއެންޑީއެފުން ވަނީ އެދިފައެވެ. އަދި ކޮންމެހެން ދަތުރުކުރަންޖެހޭ ފަރާތްތަކުން ވެސް، ދަތުރުކުރާ އިރު މޫސުމަށް ޚާއްޞަ ސަމާލުކަމެއް ދިނުމަށްވެސް ވަނީ އެދިފައެވެ.
މީގެ އިތުރުން އެމްއެންޑީއެފުން ވަނީ ރޭގަނޑު ދަތުރު ނުކުރުމަށާއި މޫސުން ތަންނުދޭ ނަމަ، މޫސުން ރަނގަޅު ވަންދެން ދަތުުރު ފަސްކޮށް އަދި މޫސުމާ ބެހޭ ގައުމީ އިދާރާއިން ރީނދޫ ނުވަތަ އޮރެންޖު ސަމާލު ނެރެފައިވަނިކޮށް ކަނޑުމައްޗަށް ނޭރުމަށްވެސް ވަނީ އިލްތިމާސްކޮށްފައެވެ.
މިދިޔަ ހަފްތާގައި ފަރަށް އުރުނު މުދާއުފުލާ ދޯންޏެއް.. ފޮޓޯ: އެމްއެންޑީއެފް
މޫސުމަށް ބަލައިގެން ދަތުރު ރޭވުމަށް ކަމާބެހޭ އިދާރާތަކުން އިލްތިމާސްކުރިނަމަވެސް، އެލާޓް ނެރެފައިވަނިކޮށްވެސް ބައެއް ފަރާތްތަކުން ދަތުރުކުރަމުންދާއިރު، މިދިޔަ ހަފްތާގެ ތެރޭގައި ކަނޑުމަތީގެ ނުރައްކާތެރި ދެ ހާދިސާއެއް ވަނީ ހިނގާފައެވެ. އެ ދެ ހާދިސާގައި ދަތުރުކުރި ދޯނިތައް ފަރަށް އުރިފައިވާއިރު، ދަތުރުކުރި މީހުން ސަލާމަތްކޮށްފައިވަނީ އެމްއެންޑީއެފާއި ފުލުހުންގެ އެހީތެރިކަމާއެކުގައެވެ. އެ ދެ ހާދިސާގައިވެސް އުޅަނދާއި މީހުންގެ މުދަލަށް ބޮޑެތި ގެއްލުންތަކެއް ލިބި ބައެއް މުދާތައް ކަނޑަށް އެޅި އޮޔާދިޔަކަން ފާހަގަކޮށްލެވެއވެެ.
Advertisement
This content is created and paid for by advertisers and does not involve Voice Journalists
