މުޖުތަމައުގެ ހުރިހާ ދާއިރާއެއްގައި ޒުވާނުންގެ ބައިވެރިވުން އޮތުން މުހިންމު: ރައީސް
މުޖުތަމައުގެ ހުރިހާ ދައިރާއެއްގައި ޒުވާނުންގެ ބައިވެރިވުން އޮންނަންޖެހޭކަމަށާއި، އެކަމަކީ ވަރަށް މުހިއްމުކަމެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު މިގޮތަށް ވިދާޅުވެފައިވަނީ، މިއަދު ފާހަގަކުރަމުންދާ ބައިނަލްއަޤްވާމީ ޒުވާނުންގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ. ރައީސް ޑރ.މުއިއްޒު ވަނީ ޤައުމުގެ ކަންކަމުގައި ޒުވާނުންގެ ބައިވެރިވުން އޮންނަންޖެހޭކަން ފާހަގަކުރައްވައި، އެކަންކަމުގައި ޒުވާނުނަށް ބާރުތައް ދިނުމުގެ މުހިންމުކަމަށް ވިދާޅުވެފައެވެ. އެގޮތުން ރައީސް ވަނީ އެކިއެކި ދާއިރާތަކުގައި މަސައްކަތްކުރާ ފަރާތްތަކަށް، އެފަރާތްތަކުން ކަންކަމުގައި ނިންމާ ނިންމުންތަކުގައި ޒުވާނުންގެ ވިސްނުންތައް ބައިވެރިކުރުމަށް ފުރުސަތުދިނުމަށް ގޮވާލާފައެވެ
މީގެ އިތުރުން ރައީސް ވަނީ ޒިންމާދާރު މަގާމުތަކުގައި ތިބޭ ފަރާތްތަކުން ޒުވާނުނަށް ފުރުސަތު ފަހިކޮށްދޭންޖެހޭކަން ފާހަގަކޮށް، ޒުވާނުންގެ ކުރިއެރުމާއި އެމީހުންގެ އުފެއްދުންތެރިކަން ކުރިއެރުވުގައި އެހީތެރިކަން ދިނުމަށްވެސް އެދިފައެވެ. އަދި ޒުވާނުން ދާން ބޭނުންވާ ހިސާބަށް ވާސިލްވުމުގައި ފުރުސަތުތައް ފަހިކޮށްދިނުމަށްވެސް ރައީސް ވަނީ އެދިފައެވެ.
ރައީސްގެ ޕޯސްޓްގައި ވަނީ ސަރުކާރުގެ ސިޔާސަތުތައް އެކުލަވާލާނީ ޒުވާނުންނަށް ފަހިވާނެގޮތަށްކަން ފާހަގަކޮށް ކަންކަމުގައި ކުރިއަށްދާނީ ޒުވާނުންގެ ފުރިހަމަ ބައިވެރިވުމާއެކުގައިކަން ފާހަގަކުރައްވާފައެވެ.
ކޮންމެ އަހަރެއްގެވެސް ބައިނަލްއަޤްވާމީ ޒުވާނުންގެ ދުވަހުގެ ގޮތުގައި ފާހަގަކުރަނީ އޮގަސްޓްމަހުގެ 12 ވަނަ ދުވަހެވެ. ޒުވާނުންގެ ދުވަސް ފާހަގަކުރުމުގެ ގޮތުން ރާއްޖޭގައި ކަމާބެހޭ އިދާރާތަކާ ޖަމިއްޔާ ޖަމިއްޔާތަކުން ކޮންމެ އަހަރަކުވެސް ޒުވާނުންނާ ގުޅޭ ހަރަކާތްތައް ހިންގަމުންދެއެވެ.
Advertisement
This content is created and paid for by advertisers and does not involve Voice Journalists
