ގައުމުގެ މިސްރާބު މިހާރު ހުރީ 21 އަހަރުގެ ކުރީގެ ހާލަތަށް ކަމަށާ އެ ހާލަތަށް ދިއުމުގެ ކުރީން ގައުމު ސަލާމަތް ކުރަން ނިކުންނަން ޖެހޭ ކަމަށް އެމްޑީޕީގެ ޗެއާޕާސަން ފައްޔާޒް އިސްމާއީލް (ފައްޔަ) ވިދާޅުވެއްޖެ އެވެ.

ފައްޔާޒް މިހެން ވިދާޅުވީ މީގެ 21 އަހަރު ކުރީން, އޮގަސްޓް 12, 13 ގެ ހަނދާން އައު ކުރައްވާ ކުރެއްވި ޕޯސްޓެއްގަ އެވެ. ޖުމްހޫރީ މައިދާނަށް އެ ދުވަހު އެތައް ސަތޭކަ ބަޔަކު އެއްވެ އިހްތިޖާޖުކުރި އެވެ.

އެ މަންޒަރުތައް ފެންނަ ފޮޓޯތަކާއެކު ފައްޔާޒް ކުރެއްވި ޕޯސްޓްގައި ވިދާޅުވީ އަޅުގަނޑުމެން މިއަދު މިދެކޭ ގާނޫނުއަސާސީއާއި، މި ހައްގުތައް ލިބިގެން ދިޔައީ މީގެ 21 އަހަރު ކުރިން މި ދުވަހު، ދިވެހިންގެ ތެރެއިން ގިނަ ބަޔަކު ތޮށިގަނޑު ފަޅާލާފައި ނުކުމެ ކުރި އިހުތިޖާޖާއި އަޑުއުފުލުންތަކުގެ ނަތީޖާއެއްގެ ގޮތުން ކަމަށެވެ.

އަދި ވިދާޅުވީ އޮގަސްޓް 12، އަދި 13 ވަނަ ދުވަހުގެ ހަނދާން އާ ކުރަނީ، އެ ދުވަހުގެ ނުރައްކާތެރި ހާލަތާ ކުރިމަތިލައި، އެ ހާލަތުގެ މައްޗަށް ކުޅިފަސް ހޯދުމުގައި ބައިވެރިވެވަޑައިގެންނެވި ހުރިހައި ބޭފުޅުންނަށް ހައްގު ޝުކުރާއި ތައުރީފު އަރިސްކޮށް އެ ބޭފުޅުންގެ މަތިން ހަނދާންކުރަމުން ކަމަށެވެ.

ފައްޔާޒް ވިދާޅުވި ގޮތުގައި އޭގެ 21 އަހަރު ފަހުން އަނެއްކާވެސް، ގައުމުގެ މިސްރާބު ހުރީ އޭރުގެ ހާލަތަށެވެ. އެެހެން ކަމުން އެ ދުވަހުގެ ހަރަކާތުން ހިތްވަރު ލިބިގަނެ، މިއަދާއި މާދަމާ ސަލާމަތްކުރުމަށް، މިއަދުގެ ހާލަތަށް އެކަށޭނޭ، އަދި ނަތީޖާ ނެރެވޭނޭ އުސޫލަކުން މަސައްކަތް ކުރަންޖެހޭ ކަމަށް ވިދާޅުވި އެވެ.