ބ. ދޮންފަނު ސުކޫލަށް އިތުރުކުރާ މަަސައްކަތްތައް ކުރަން ފަހި ދިރިއުޅުން ކޯޕަރޭޝަނާއި ހަވާލުކޮށްފި އެވެ.
އެ ކޯޕަރޭޝަނާއި މި މަސައްކަތްތައް ހަވާލުކޮށްފައި ވަނީ އަދު ދޮންފަނުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ރަށުގެ ރައްޔިތުންނާއި ބައްދަލު ކުރެއްވުމަށް ބޭއްވި ޖަލްސާގަ އެވެ. އެ މަޝްރޫއުގެ އެއްބަސްވުމުގައި ސޮއިކުރެއްވީ މިނިސްޓަރު ޑރ. އިސްމާއީލް ޝަފީއު އާއި އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް އެވެ.
މި މަސައްކަތުގެ ދަށުން ހަ ކްލާސް ރޫމާއި ލައިބްރަރީ އާއި މަލްޓިޕާޕަސް ހޯލާއި ލެބޯޓަރީ އިމާރާތް ކުރާނެ އެވެ.
މީގެ އިތުރުން ވެސް ގިނަ މަސައްކަތްތަކެއް އެ ރަށުގައި ކުރިއަށް ގެންދަވާނެ ކަން ރައީސް ވަނީ އިއުލާނު ކުރައްވާފަ އެވެ. އެގޮތުން ފުޓްސަލް ދަނޑު އަލުން ތަރައްގީ ކުރާނެ ކަމަށް ވިދާޅުވި އެވެ. އެ ދަނޑު ތަރައްގީ ކުރާނީ ހޭންޑްބޯލް ވެސް ކުޅެވޭ ގޮތަށް ކަމަށް ރައީސް ވިދާޅުވި އެވެ.
އަދި ވޮލީ ކޯޓެއް ހެދުމާއި ފިޓްނެސް ރިކްރިއޭޝަން ސެންޓަރެއް އިމާރާތް ކުރުމުގެ އިތުރުން އައުޓް ޑޯ ޖިމެއް ގާއިމުކުރުން ވެސް ހިމެނެ އެވެ.
މީގެ އިތުރުން އެ ރަށުގައި ހުއްޓިފައިވާ ފެނާއި ނަރުދަމާގެ މަޝްރޫއު އަލުން ފައްޓަވާނެ ކަމަށް ވެސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
