ޕާކިސްތާނަށް މިހާރު ކުރަމުންދާ މޫސުމީ ވިއްސާރާގައި ވޭތުވެދިޔަ 24 ގަޑިއިރު އެކަނިވެސް 200 އަށްވުރެ ގިނަ މީހުން މަރުވެ،  އަވަށްތަކަށް ބޮޑެތި ގެއްލުންތަކެއް ލިބިއްޖެއެވެ.

ޕާކިސްތާނުގެ ނެޝަނަލް ޑިޒާސްޓާ މެނޭޖްމަންޓް މަންޓް އޮފީހުން ބުނެފައިވަނީ، މިހާރު ކުރަމުންގެންދާ ވިއްސާރާގައި ފެންބޮޑުވެ ބިންގަނޑު ކަނޑައިގެން ދިއުމުގެ ސަބަބުން ވޭތުވެދިޔަ 24 ގަޑިއިރު އެކަނިވެސް އެތައް ބަޔަކު މަރުވެ، އަވައްތަށް ފެނުގެ އަޑިއަށް ގޮސްފައިވާކަމަށެވެ. ވއިްސާރައިގެ އަސަރު އެންމެބޮޑަށް ކުރި އަވަށްތަކުގެ ތެރޭގައި ޚައިބަރު ޕަޚްތުންޚްވާން ޕްރޮވިންސްގެ ބާނާ އަވށް ހިމެނެއެވެ. 

އެ އަވަށަށް ވިއްސާރަ ވެހުމުގެ އިތުރުން ގުގުރައި ހޮނުއެޅުމުގެ ސަބަބުންވެސް އެތައް ގެއްލުންތަކެއް ވަނީ ލިބިފައެވެ. ވާރޭވެހި ބިންގަނޑު ކަނޑައިގެންގޮސް ވެއްޓުނު ގެތައް ނަގައި ސާފްކުރުމުގެ މަސައްކަތް ޕާކިސްތާނުގެ ކަމާބެހޭ އިދާރާތަކުން އަންނަނީ އަދިވެސް ކުރަމުންނެވެ. މީހުން ސަލާމަތްކުރުމުގެ މަސައްކަތުގައި ހަރަކާތްތެރިވަމުންދިޔަ ހެލިކޮޕްޓަރެއް ވެއްޓުނުއިރު، މޫސުން ގޯސްވުމުގެ ސަބަބުން އެހީގެ މަސައްކަތްތަކަށްވެސް ވަނީ ހުރަސްއެޅިފައެވެ.

ބިންގަނޑު ކަނޑައިގެން ގޮސް ގެތައް ވެއްޓުމުގެ ހާދިސާގައި މިހާތަނަށް މަރުވި މީހުންގެ ތެރޭގައި 19 އަންހެނަކާއި، 17 ކުޑަކުދިން ހިމެނޭކަމަށް ޕާކިސްތާނުގެ ކަމާބެހޭ އިދާރާތަކުން ބުނެއެވެ.

ޕާކިސްތާނުގެ އެކި ސަރަހައްދުތަކަށް މިދުވަސްވަރު މޫސުން ވަރަށްބޮޑަށް ގޯސްވާނޭކަމުގެ އިންޒާރު އެޤައުމުގެ މީޓިއޮރޮލޮޖިކަލް ޑިޕާޓްމެންޓް (ޕީ.އެމް.ޑީ) އިން ވަނީ މީގެކުރިން ދީފައެވެ. އެގޮތުން ޖުލައިގެ ފަހުން މޫސުން ވަރަށް ގޯސްވާނޭކަމަށް ލަފާކޮށް މޫސުމާ ބެހޭ އިދާރާއިން ވަނީ އިންޒާރުދީފައެވެ.