އިސްރާއީލުން ވެސްޓްބޭންކުގައި ޔަހޫދީ އާބާދީތައް އިތުރުކުރުމަށް ނިންމި ނިންމުމާ ދެކޮޅަށް ފްރާންސުން ނިކުމެއްޖެއެވެ.
ދައުލަތެއްގެ ސިފަ ޖެއްސުމަށް މަސައްކަތްކުރަމުންދާ ޔަހޫދީ ސަރުކާރުން ވަނީ ވެސްޓްބޭންކުގައި ޔަހޫދީންގެ އާބާދީތައް އިތުރުކުރަން ނިންމައި ބޮޑު ހައުސިން މަޝްރޫޢުއެއް ފެށުމަށް ނިންމާފައެވެ. އީ 1 ގެ ނަމުން ނަންދީފައިވާ މި މަޝްރޫޢުއާ ގުޅޭގޮތުން ފްރާންސްގެ ހާރިހީ ވުޒާރާއިން ބުނެފައިވަނީ، ވެސްޓްބޭންކުގައި ޔަހޫދީ އާބާދީތައް އިތުރުކުރަން ނިންމުމަކީ ހެދިފައިހުރި ބައިނަލްއަޤްވާމީ މުއާހަދާތަކާއި ޗާޓަރުތަކާ ފުށުއަރާ ކަމެއްކަމަށެވެ. މިއީ އިސްރާއީލުން ޤާނޫނުތައް މުގުރައި ހިންގުމަށް ނިންމާފައިވާ ބޮޑު ޖަރީމާއެއްކަމަށާއި، މިކަން ހުއްޓާލަން ޖެހޭކަމަށް ފުރާންސްގެ ހާރިޖީއްޔާއިން ވަނީ ފާހަގަކޮށްފައެވެ.
އިސްރާއީލުން ވަނީ ވެސްޓްބޭންކުގައި 3،400 އަށްވުރެ ގިނަ ހައުސިން ޔުނިޓްތައް އެޅުމުގެ ޕްލޭނެއް އިއުލާނުކޮށްފައެވެ. މިކަމާ ދެކޮޅަށް ބައިނަލްއަޤްވާމި އެކި ފަރާތްތަކުން އަންނަނީ އަޑު އުފުލަމުންނެވެ. ޖޯޑަން އަދި ޤަތަރުންވެސް ވަނީ އިސްރާއީލްގެ އެ ޕްލޭނަށް ވަރަށްބޮޑަށް ކުށްވެރިކޮށްފައެވެ.
ބައިނަލްއަގްވާމީ ފަރާތްތަކުން ފިއްތުންތައް ކުރިމަތިކުރުވި ނަމަވެސް ހަމަޖެހިފައިވާ ގޮތަށް އެކަން ކުރިއަށްދާނޭކަމަށް ޔަހޫދީ ސަރުކާރުން ވަނީ ބުނެފައެވެ. އެގޮތުން ބައިނަލްއަޤްވާމީ ފަރާތްތަކުން ކިތަންމެ ވަރަކަށް ފާޑުކީނަމަަވެސް އިސްރާއީލުން އެކަން ނުހުއްޓާނޭކަމަށް އެ ޤައުމުގެ ސަރުކާރުން ވަނީ ބުނެފައެވެެ.
Advertisement
This content is created and paid for by advertisers and does not involve Voice Journalists
