މީޑިއާގެ ކަންކަން ބެލުމަށް ރައްޔިތުންގެ މަޖިލީހުގެ ތަޅުމަށް ހުށެހެޅި ބިލާ ގުޅިގެން ރައްޔިތުން މަޖިލީހުގެ ގެލަރީގައި ނޫސްވެރިން މިއަދު ސުލްހަވެރި އިހުތިޖާޖެއް ކުރިއަށްގެންގޮސްފިއެވެ.

މަޖިލީހުގެ ޖަލްސާތައް ބެލުމަށް ނޫސްވެރިންނަށް ހާއްސަކޮށްފައިވާ ގެލަރީގައި އެކި މީޑިއާތަކުން ތަމްސީލްކުރާ ނޫސްވެރިން މިއަދު ތިބީ އަނގަމަތީ އަތްއަޅައިގެންނެވެ. ނޫސްވެރިންގެ ހިތްހަމަ ނުޖެހުން އޮތް އެ ބިލް މީގެކުރިންވެސް މަޖިލީހަށް ހުށަހެޅިއެވެ. ނަމަވެސް މީޑިއާތަކުގެ ކަންބޮޑުވުންތަކާއެކު އެބިލް އަނބުރާ ވަނީ ނަގާފައެވެ. ނަމަވެސް ތުޅާދޫ ދައިރާގެ މެމްބަރު އަޞްދުލް ހަންނާން ވަނީ ދެވަނަ ފަހަަރަށް އެ ބިލް މަޖިލީހަށް ވައްދާފައެވެ. އަދި މަޖިލީހުގެ ތަޅުމަށް ބިލް ބަލައިގަނެ މިއަދު ވަނީ ބަހުސްކުރުން ކުރިއަށްގެންގޮސްފައެވެ.

ބިލް މަޖިލީހުގެ ތަޅުމަށް މިއަދު ހުށަހެޅިއިރު، ނޫސްވެރިން ތަމްސީލްކުރާ ޖަމިއްޔާތަކާއި، މީޑިއާތަކުގެ ބަލަދުވެރި ފަރާތް، މޯލްޑިވްސް މީޑިއާ ކައުްނސިލުން ވަނީ އެ ބިލް އަނބުރާ ގެންދިއުމަށް ގޮވާލައި ބަޔާންވެސް ނެރެފައެވެ. 

މޯލްޑިވްސް ޖާނަލިސްޓް އެސޯސިއޭޝަނުން ނެރުނު ބަޔާނުގައި ބުނެފައިވަނީ، ބިލް ފަރުމާކޮށްފައި ވަނީ މީޑިއާތައް ރެގިއުލޭޓް ކުރުމުގެ ބޮޑެތި ބާރުތަކެއް ރައީސުލްޖުމްހޫރިއްޔާގެ މުށުތެރެއަށް ޖަމާކޮށް، މީޑިއާތައް ސަރުކާރުގެ ފުރިހަމަ ބާރުގެ ދަށަށް ގެނެސް، ނޫސްވެރިން ބިރުވެރިކަމެއްގެ ތެރޭގައި ބޭއްވުމުގެ ފަލްސަފާގައި ކަމަށް ދެކޭކަމަށެވެ.

އެމްއެމްސީން ނެރުނު ބަޔާނުގައި ވަނީ ބިލް ހުށަހަޅާފައިވަނީ އަދުލުވެރިކަމެއްނެތް، އެއިރެއްގައި އޮންނަ މަޖިލީހުގެ މެޖޯރިތީ ޕާޓީ އާއި ރައީސުލްޖުމްހޫރިއްޔާ ބޭނުންވާގޮތަށް މީޑިއާ ކޮންޓްރޯލް ކުރެވޭ ގޮތަށްކަމަށެވެ.

ބިލުގެ މައްސަލާގައި ބައެއް ނޫސްވެރިން ވަނީ މަޖިލީހުގެ އިދާރާ ދޮށަށްވެސް އެއްވެ، ހިތްހަމަ ނުޖެހުން ފާޅުކޮށްފައެވެ.