އއ.ބޮޑުފުޅަދޫގައި 50 ހައުސިންޔުނިޓް އެޅުމަށް ނިންމާފައިވާކަން ރައީސުލުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އއ.އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ބޮޑުފުޅަދޫއަށް ކުރެއްވި ޒިޔާރަތުގައި އެރަށުގެ ރައްޔިތުންނާ ބައްދަލުކޮށްލެއްވުމަށް ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ.މުއިއްޒު ވިދާޅުވީ، ބޯހިޔާވަހިކަމަކީ މިހާރު ރާއްޖެއަށް ކުރިމަތިވެފައިވާ އެންމެބޮޑު މައްސަލަ ކަމަށެވެ. އެގޮތުން ބޮޑުފުލަދޫގައި ހައުސިން ޔުނިޓް މަޝްރޫޢުއެއް ކުރިއަށްގެންދާނޭކަން ފާހަގަކުރައްވަމުން ރައީސް ވިދާޅުވީ މި ހައުސިން ޔުނިޓް އަޅާނީ އަންނަ އަހަރުގެ ތެރޭގައި ކަމަށެވެ. އެގޮތުން އަންނަ އަހަރުގެ ކުރީކޮޅު އެ މަޝްރޫޢުގެ މަސައްކަތް ފަށާނޭކަމަށް ރައީސް ވިދާޅުވިއެވެ.

ހައުސިން ޔުނިޓްގެ އިތުރުން ބޮޑުފުޅަދޫ ސްކޫލްގައި އިމާރާތްކުރާ 5 ކްލާސްރޫމާއި،  މަލްޓިޕާޕަސް ހޯލާއި އެނޫންވެސް މަސައްކަތްތައް އެންމެ ލަސްވެގެން ކުރިއަށްއޮތް 3 މަސްދުވަހުގެ ތެރޭގައި ފެށިގެންދާނޭކަމަށް ރައީސް ވިދާޅުވިއެވެ.

ބޮޑުފުޅަދޫގައި ކުޅިވަރުގެ ވަސީލަތްތައް ގާއިމްކުރުމަށް ސަރުކާރުން އިސްކަންދެއްވާކަން ފާހަގަކުރައްވަމުން ރައީސް ޑރ.މުއިއްޒު ވަނީ، އެރަށުގައި ގާއިމްކުރެވޭ ހޭންޑްބޯލް ކޯޓްގެ އަމަލީ މަސައްކަތް މިއަހަރު ފަށައި، ފުޓްބޯޅަ ދަނޑުގެ ވަސީލަތްތައްވެސް މި އަހަރު ގާއިމްކުރެވޭނެކަމަށް ވިދާޅުވެފައެވެ. އަދި އަންނަ އަހަރުގެ ކުރީކޮޅު އައު ފުޓްސެަލް ދަނޑެއް ގާއިމްކޮއްދެއްވާނޭ ކަމަށްވެސް ރައީސް ވިދާޅުވިއެވެ. އަދި ބޮޑުފުޅަދޫގައި ޒުވާނުންގެ މަރުކަޒު ހުރިނަމަވެސް އެތަނުގައި ގިނަ މައްސަލަތަކެއް ހުރިކަމަށާއި، ކޮންޓްރެކްޓާ ލައްވާ ތަނުގެ މައްސަލަތައް ހައްލުކުރުމުގެ މަސައްކަތްކުރައްވާނޭ ކަމަށް ރައީސް ވިދާޅުވިއެވެ.

އޭގެ އިތުރުން ބޮޑުފުޅަދޯގައި ކުރިން ހިއްކާފައިވާ 4 ހެކަޓަރުގެ ބިން ރަށު ކައުންސިލާ ހަވާލުނުކޮށް އޮތް އޮތުމަކީ މުހިއްމު އެއްކަމެއްގެ ގޮތުގައި ރައީސް ވަނީ ފާހަގަކޮއްފައެވެ. އަދި މިކަމުގެ ސަބަބުން އެތަން ބޭނުން ނުކުރެވި ހިމާޔަތްވެސް ނުކުރެވި އޮތްކަން ފާހަގަކޮށް، ރަށުގެ ގޮނޑުދޮށް ހިމާޔަށް ނުކުރެވި އޮތީ މިކަމުގެ ސަބަބުންކަމަށް ރައީސްވަނީ ފާހަގަކޮށްފައެވެ.