ޕާކިސްތާނަށް މިހާރު ކުރަމުންދާ މޫސުމީ ވިއްސާރައާ ގުޅިގެން އެޤައުމުގެ އުތުރުގެ ސަރަހައްދުތަކަށް ދަތުރުކުރުމުގައި ސަމާލުވުމަށް އެޤައުމުގެ ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއޭމްއޭ) އިން އިލްތިމާސްކޮށްފިއެވެ.

އެންޑީއެމްއޭއިން ބުނީ ޕާކިސްތާނަށް ކުރަމުންދާ ވިއްސާރައިގެ ސަބަބުން ބޮޑެތި ގެއްލުންތަކެއް ލިބިފައިވާކަމަށާއި، އެގޮތުން ބައެއް ސަރަހައްދުތަށް މިހާރު އޮތީ ފެނ އަޑީގައިކަމަށެވެ. ވާރޭގެ ސަބަބުން ބައެއް ސަރަހައްދުތަކަށް ދަތުރުކުރުން ރައްކާތެރި ނޫންކަމަށް އެންޑީއެމްއޭއިން ވަނީ ފާހަގަކޮށްފައެވެ. އެގޮތުން އުތުރުގެ ސަރަހައްދުތަކަށް ފަތުރުވެރިން އެއްގޮތަކަށްވެސް ދަތުރުކޮށް ނޫޅުމަށް ވަނީ އިލްތިމާސްކޮށްފައެވެ. އެގޮތުން އިސްލާމް އާބާދް، ޕަންޖާބް، އާޒާދު ކަޝްމީރުުގެ ބައެއް ސަރަހައްދުތަކަށް މިވަގުތު ދަތުރުކުރުން ރައްކާތެރިނޫންކަމަށް ވަނީ ބުނެފައެވެ.

ޕާކިސްތާނަށް ކުރަމުންދާ ވިއްސާރާގައި ކޯރުތައް ބަންޑުންވެ ބިންގަނޑުތިރި ހިސާބުތަކުގައި ދިރިއުޅެމުންދާ ފަރާތްތަކަށް ވަނީ ބޮޑެތި ގެއްލުންތަކާ ކުރިމަތިލާން ޖެހިފައެވެ. ކަމާބެހޭ ފަރާތްތަކުން ވަނީ އޮގަސްޓްމަހާ ހިސާބަށް މިހާރު ކުރަމުންދާ ވިއްސާރަ ދިގުލައިގެންދާނޭކަމަށް ބުނެފައެވެ.

ވާރޭގެ ސަބަބުން ޕާކިސްތާނުގެ އެންމެބޮޑު އަވަށްކަމަށްވާ ކަރާޗީވެސް ަނީ ތައްޔާރީ ހާލަތަކަށް ގެނެސްފައެވެ. އެގޮތުން އަސާސީ ގިދުމަތްތައްދޭ އޮފީސްތައް ފިޔަވައި އެހެން އޮފީސްތައް ވަނީ ބަންދުކޮށްފައެވެ. މީގެ އިތުރުން ވާރޭވެހި ބިންގަނޑު ކަނޑައިގެންދިއުމުގެ ސަބަބުން ކަރަންޓް ވިއުގައަށްވެސް ވަނީ ބޮޑެތި ގެއްލުންތަކެއް ލިބިފައެވެ. ބައެއް ސަރަހައްދުތަކަށް ކަރަންޓް ނުލިބި އެތައްގަޑިއިރެއް ވެފައިވާކަމަށް މައުލޫމާތު ލިބެއެވެ. 

ޕާކިސްތާނުގެ ކަމާބެހޭ ފަރާތްތަކުން ވަނީ މިހާރު ކުރަމުންދާގޮތަށް ނުހުއްޓި ވިއްސާރަކުރާނަމަ 2022 ވަނަ އަހަރުގެ ބޮޑު ވިއްސާރާގައި އެޤައުމަށް ލިބުނުވަރުގެ ބޮޑު ގެއްލުމެއް ލިބިދާނެކަން ހާމަކޮށްފައެވެ.

ޕާކިސްތާނަކީ އެޤައުމަށް ކުރާ މޫސުމީ ވިއްސާރާގައި ވަރަށްބޮޑަށް ގެއްލުންލިބޭ ޤައުމެކެވެ އެންމެފަހުން 2022 ވަނަ އަހަރު އެޤައުމަށް ކުރި ވިއްސާރާގައި 33 މިލިއަނަށްވުރެ ގިނަ މީހުންނަށް އެކި ގޮތްގޮތުން ގެއްލުންލިބި 9 މިލިއަނަށްވުރެ ގިނަ މީހުން ހާލުގައި ޖެހުނެވެ. މީގެ އިތުރުން ދެހާހާ ގާތްކުރާ އަދަދެއްގެ މީހުންގެ ފުރާނަ ގެއްލުނެވެ.