ޒަކާތުގެ ކަންކަމުގައި މުޖުތަމައުގެ ހޭލުންތެރިކަން އިތުރުކުރަން ޖެހޭކަމަށް މެލޭޝިއާގެ އިންސެފް ޔުނިވާސިޓީގެ ޑީން އަދި އިސްލާމިކް ފައިނޭންސްގެ ދާއިރާގެ ތަޖުރިބާކާރެއްމަށްވާ ޑރ. އާއިޝަތު މުނިޒާ ވިދާޅުވެއްޖެއެވެ.
މިއަދު ކުރިއަށްދިޔަ ޒަކާތު އިންޓަނޭޝަނަލް ކޮންފަރެންސްގައި ޒަކާތާ ގުޅޭ ކަންކަމުގައި ރައްޔިތުންގެ ހޭލުންތެރިކަން އިތުރުކުރުން މުހިންމުކަމުގެ މައްޗަށް ވާހަކަދައްކަވަމުން ޑރ.މުނީޒާ ވިދާޅުވީ، ޒަކާތުގެ ގާނޫނެއް ހަދައި ޒަކާތް ދިނުން ފުޅާކުރާތީ ޓެކްސްއާ ގުޅުވައިގެން ސުވާލު އުފައްދަނީ ދިވެހިންގެ މެދުގައި ހޭލުންތެރިކަން ނެތުމުން ކަމަށް ދެކޭކަމަށެވެ.
އޭނާ ވިދާޅުވީ ގިނަ ރައްޔިތުންގެ ހިތުގައި އުފެދިފައިވާ އެއް މުހިންމު ސުވާލަކީ ދައުލަތަށް އެކި ބާވަތުގެ ޓެކްސް ދައްކަމުން ދާއިރު، ޒަކާތު ފަންޑުގެ ނިޒާމުގެ ތެރެއިން އިންވެސްޓްކޮށްގެން ފަޤީރުންނާއި މިސްކީނުންނަށް ޒަކާތް ބެހުމުގެ މަސައްކަތް ފުޅާކުރުމަށް ސަރުކާރުން މަސައްކަތްކުރާ ބޭނުމަކީ ކޮބައިތޯ ބައެއް ފަރާތްތަކުން ސުވާލު އުފައްދަމުންދާކަމަށެވެ. ތަފާތު ނަންނަމުގައި ސަރުކާރަށް ޓެކްސް ނެގެމުންދަނީ ރައްޔިތުންނަށް އަސާސީ ޚިދުމަތްތައް ފޯރުކޮށްދީ، މުޖުތަމަޢުގެ ދެ ދިރިއުޅުމުގެ ފެންވަރު މަތިކޮށް، ޤައުމު ތަރައްޤީކުރުމަށް ކަމަށްވާއިރު، ޒަކާތުގެ ފައިސާއިން އިންވެސްޓްކުރުމާ ގުޅޭގޮތުން ސުވާލު އުފައްދާ ފަރާތްތައް ވަރަށް ގިނަކަން މުނީޒާ ފާހަގަ ކުރެއްވިއެވެ.
ޒަކާތު ކޮންފަރެންސްގެ ތެރެއިން.. ފޮޓޯ؛ އިސްލާމިކް މިނިސްޓްރީ
ޓެކްސް އާއި ޒަކާތުގެ ގާނޫނުގެ ތަފާތު ދައްކަވަމުން މުނީޒާ ވިދާޅުވީ ޓެކްސްއާ ގުޅޭ ގާނޫނުތަކަކީ އިންސާނުން އުފައްދާފައިވާ ގާނޫންތަކެއްކަމަށާއި، ޒަކާތަކީ އިލާހީ ވާޖިބެއްކަމަށެވެ. އަދި ޓެކްސް އިން ނަގާ އެއްޗަކުން ޤައުމު ހިންގުމުގެ ކަންކަން ދެމެހެއްޓުނު ނަމަވެސް ޒަކާތުން އެންމެ ނާޒުކު މީހުން އުފުލައިދޭކަމަށެވެ. އޭނާގެ ވާހަކަފުޅުގައި، ޒަކާތުގެ ނިޒާމު ހަރުދަނާކުރުމަށް ޚާއްޞަ ޤާނޫނެއްގެ މުހިންމުކަން ފާހަގަކުރެއްވިއެވެ. ނަމަވެސް، ހަމައެކަނި ޤާނޫނީ އޮނިގަނޑަކުން މި ކަން ޙައްލެއް ނުކުރެވޭނެ ކަމަށް ވިދާޅުވިއެވެ. އެހެންކަމުން، ޒަކާތް ނެގުމާއި ބެލެހެއްޓުމުގެ ދާއިރާގައި އައު ވިސްނުންތަކެއް ގެންގުޅުމުގެ މުހިންމުކަން އޭނާ ފާހަގަކުރެއްވިއެވެ.
ޒަކާތާ ގުޅޭ ކަންކަން އިތުރަށް ހަރުދަނާކޮށް ޒަމާނީ ކުރުމަށް މުނީޒާ ހުށަހެޅުއްވި ހުށަހެޅުންތަކުގެ ތެރޭގައި، ޓެކްނޮލޮޖީގެ ވަސީލަތްތަކުގެ އެންމެ އެދެވޭ ބޭނުން ހިފުމާއި، ޒަކާތާ ގުޅޭ ކަންކަން ޑިޖިޓަލައިޒް ކުރުން ހިމެނެއެވެ.
ޒަކާތު ކޮންފަރެންސްގެ ތެރެއިން.. ފޮޓޯ؛ އިސްލާމިކް މިނިސްޓްރީ
މީގެ އިތުރުން، އިންޓަނެޓް އޮފް ތިންގްސް (އައިއޯޓީ) ބޭނުންކޮށްގެން ގޭބީސީތަކުގެ ފަގީރުކަން ރިއަލް ޓައިމްގައި ދެނެގަތުމާއި، ޒަކާތާ މެދު އާންމުން ހޭލުންތެރިކުރުމަށް އިތުރު ކެމްޕެއިންތަކެއް ފެށުމަށް ވެސް ހުށަހަޅުއްވިއެވެ. އަދި ހަމައެއާއެކު، ގައުމީ ތަރައްގީގެ ސްޓްރެޓެޖީތަކުގައި ޒަކާތުގެ ވާހަކަތައް ހިމެނުމާއި، ޒަކާތާ ގުޅޭ ކަންކަމަށް މީހުން ތަމްރީންކޮށް އިންވެސްޓް ކުރުން ފަދަ ކަންކަން މުނީޒާ ފާހަގަކުރެއްވިއެވެ.
މި ހުށަހެޅުންތަކުގެ މައިގަނޑު މަޤްޞަދަކީ ޒަކާތުގެ ނިޒާމު އިތުރަށް ހަރުދަނާކޮށް، ޒަމާނީ ވަސީލަތްތަކުގެ އެހީގައި އެންމެ އެކަށީގެންވާ ގޮތުގައި ޒަކާތް ބެހުމާއި، މުޖުތަމަޢުގެ އިޤްތިޞާދީ ފުދުންތެރިކަން އިތުރުކުރުންކަމަށް މުނީޒާ ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
