އިސްރާއީލްގެ ޤައުމީ ސަލާމަތަށް ނުރައްކާވާ ކަމަށްބުނެ، ފަލަސްތީނު މީހުންގެ ޒައިތޫނިގަސްތައް ބިމާހަމަކުރަނީ
އިސްރާއީލްގެ ޤައުމީ ސަލާމަތަށް ނުރައްކާވާ ކަމަށްބުނެ، ފަލަސްތީނު މީހުންގެ ޒައިތޫނިގަސްތައް ކެނޑުމުގެ މަސައްކަތް ޔަހޫދީ ސިފައިން ފަށައިފިއެވެ.
އަލްޖަޒީރާއިން ބުނީ ވެސްޓްބޭންކްގެ ފަލަސްތީނު މީހުން ދިރިއުޅެމުންދާ ސަރަހައްދުގެ ވިލެޖެއްގައި ހުރި ޒައިތޫނި ގަސްތައް ބިމާހަމަކުރުމުގެ މަސައްކަތް ހައްދުފަނަ އަޅާފައިވާ އިސްރާއީލްގެ ސިފައިން ފަށާފައިވާކަމަށެވެ. މި ވިލެޖަކީ ފަލަސްތީނަށް ނިސްބަތްވާ 4،000 މީހުން އުޅެމުންދާ ސަރަހައްދެކެވެ.
އިސްރާއީލް ސިފައިންގެ މި ނޭއްގާނީ އަމަލުތަކާ ގުޅޭގޮތުން އެ ވިލެޖްގެ ކައުންސިލްގެ ނައިބު މަރުޒޫކް އަބޫ ނައީމް ފަލަސްތީނުގެ ވަފާ ނިއުސް އޭޖެންސީއަށް މައުލޫމާތު ދެއްވަމުން ވިދާޅުވީ، ޒައިތޫނި ގަސްތައް ކެނޑުމުގެ އިތުރުން ޔަހޫދީ ސިފައިން ދަނީ އެ ވިލެޖުގައި ދިރިއުޅެމުންދާ ފަލަސްތީނު ރައްޔިތުންގެ ގެތައްވެސް ބިމާ ހަމަކުރަމުންކަމަށެވެ. މިހާތަނަށް 30 ހަށްވުރެ ގިނަ ގެ ބިމާ ހަމަކޮށްލާފައިވާއިރު، އެމީހުންގެ އުޅަނދުތައްވެސް ހަލާކުކޮށްލާފައިވާކަމަށް އޭނާ ވިދާޅުވިއެވެ.
" ޒައިތޫނި ގަހަކީ ފަލަސްތީނުގެ ފަހްރު. 10 އަހަރުދުވަހުގެ ތެރޭގައި ހެއްދި ޒައިތޫނި ގަސްތައް ކުދަ ހިނދުކޮޅެއްގެ ތެރޭގައި އިސްރާއީލް ސިފައިން މިވަނީ ބިމާހަމަކޮށްލާފައި" މަރުޒޫކް އަބޫ ނައީމް ވަރަށް އަސަރާއެކު ވިދާޅުވިއެވެ.
އިސްރާއީލްގެ ހައްދުފަހަނަ އަޅާފައިވާ ސިފައިން 2023 ވަނަ އަހަރު ޣައްޒާގައި ޖަރީމާތައް ހިންގަންދ ފެށިފަހުން، ވެސްޓްބޭންކުން ފަލަސްތީނު ރައްޔިތުން ބޭރުކުރުމުގެ މަސައްކަތް ވަނީ ފަށާފައެވެ. މީގެ މައިގަނޑު ބޭނުމަކީ ޔަހޫދީންނަށް ބޯހިޔާވަހިކަން ހޯދައިދިނުމެވެ.
އިސްރާއީލްގެ ބޮޑުވަޒީރު ނަތަންޠާހޫ ވަނީ ޔަހޫދީންނަށް ބޯހިޔާވަހިކަން ފޯރުކޮށްދިނުމަށް ފަލަސްތީނުގެ ބިންތަކުގައި ބިޔަ މަޝްރޫޢުއެއް ކުރިއަށްގެންދާނޭކަން އިއުލާނުކޮށްފައެވެ. ނަތަންޔާހޫގެ މި މަޝްރޫޢުއަށް ބައިނަލްއަޤްވާމީ މުޖުތަމައުއިން ދަނީ ކުށްވެރިކުރަމުންނެވެ.
Advertisement
This content is created and paid for by advertisers and does not involve Voice Journalists
