ހދ.މަކުނުދޫގެ މަގުތައް ޒަމާނީ ފެންވަރަށް ތަރައްޤީކުރުމަށް ރޯޑް ޑިވެލޮޕްމަންޓް ކޯޕަރޭޝަން، އާރްޑީސީއާއި ހަވަލުކޮށްފިއެވެ.
މި މަސައްކަތް އާރްދީސީއާ ހަވާލުކޮއްފައި ވަނީ ރައީސުލޮޖުމްހޫރިއްޔާ ޑރ. މުހައްމަދު މުއިއްޒު ހދ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން މިއަދު އެރަށުގައި ބޭއްވި ރަސްމިއްޔާތެއްގައެވެ. މިއަދު ބޭއްވި ރަސްމިއްޔާތުގައި މަގުތައް ތަރައްޤީކުރުމުގެ އެއްބަސްވުމުގައި ހައުސިންގ އެންޑް އިންފްރާސްޓްރަކްޗަރގެ ފަރާތުން ސޮއި ކުރެއްވީ މިނިސްޓަރ އޮފް ސްޓޭޓް ޙަސަން ރަޝީދުއެވެ. އާރުޑީސީގެ ފަރާތުން ސޮއިކުރެއްވީ، މެނޭޖިންގ ޑިރެކްޓަރު އިބްރާހީމް ނަޡީމް އެވެ.
ސަރުކާރުން އަންނަނީ ރާއްޖޭގެ އެކި ރަށްރަށުގައި މަގުތައް ޒަމާނީ ފެންވަރަށް ތަރައްޤީކުރުމުގެ މަސައްކަތްތައް ކުރުމަށް އާރްޑީސީއާ ހަވާލުކުރައްވަމުންނެވެ.
ސަރުކާރުން ބުނެފައިވަނީ ރަށްރަށުގެ މަގުތައް ޒަމާނީ ފެންވަރަށް ތަރައްޤީކުރާއިރު ރަށުގެ ރައްޔިތުން އެދޭގޮތަށް އެކަންކުރުމަށް އިސްކަންދެއްވާނޭކަމަށެވެ. ރަށްރަށުގެ މަގުތައް ތަރައްޤީކުުމުގައި ފުރަތަމަ އިސްކަންދޭނީ ރަށުގެ އިސް މުއައްސަސާތައް ހުންނަ މަގުތަކާއި ބޮޑަށް ހަލާކުވެފައި ހުންނަ މަގުތައް ތަރައްޤީކުރުމަށެވެ.
އާރުޑީސީން ދަނީ މިހާރުވެސް ވަރަށް ގިނަ ރަށްތަކުގެ މަގުތައް ތަރައްޤީކުރުމުގެ މަސައްކަތް ކުރަމުންނެވެ. މަގުތަކުގެ އިތުރުން ރަށްރަށުގެ ކުޅިވަރު މައިދާންތައްވެސް އެކުްނފުނިން ދަނީ ތަރައްޤީކުރަމުންނެވެ.
Advertisement
This content is created and paid for by advertisers and does not involve Voice Journalists
