ވައުދުވަނީ ކަންކަން ކުރެވޭނެކަމުގެ ޔަގީންކަން އޮތުމުން: ރައީސް
ހދ.ކުރިނބީގައި ސަރުކާރުން ކުރިއަށްގެންދިއުމަށް ނިންމާފައިވާ މަޝްރޫޢުތައް ވައުދާ އެއްގޮތަށް އަންނަ އަހަރުގެ ތެރޭގައި ނިންމާލެވޭނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހދ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ކުރިނބީ ރައްޔިތުންނާ ވާހަކަފުޅު ދައްކަވަމުން ވިދާޅުވީ، ހދ. ކުރިނބީގެ ތަރައްޤީގެ މަސައްކަތްތައް ފެށި އަންނަ އަހަރުގެ ތެރޭގައި މަސައްކަތްތައް ނިންމާލެވޭނެ ކަމަށެވެ. ރައީސް ވިދާޅުވީ ކުރިނބީގެ ތަރައްޤީއަށް ކުރިއަށްގެންދިއުމަށް ނިންމި މަޝްރުޢުތަކަށް ބަޖެޓް ހަމަޖައްސައި ކުރިއަށްދާނޭގޮތް މިހާރު ނިންމާފައިވާކަމަށެވެ.
ރައީސް ވިދާޅުވީ ކުރިނބީގެ ތަރައްޤީއަށް ސަރުކާރުން ވީ ވައުދު ފުރިހަމަކޮށްދެއްވާނޭ ކަމަށާއި، އެކަންކަމަށް ވަައުދުވެފައިވާނީ ކުރެވޭނެކަމުގެ ޔަގީންކަން އޮތުމުންކަމަށެވެ. ކުރިނބީ ބަނދަރުގެ މަސައްކަތް ރައްޔިތުން އެދުނުގޮތަށް ކުރިއަށްގެންދަވާނޭކަން ފާހަގަކުރައްވަމުން ރައީސް ވިދާޅުވީ ރައްޔިތުން ބޭނުންވާގޮތަށް ބޭރުތޮށީގެ ބޭނުންކުރެވޭނޭގޮތަށް ބަނދަރު ތަރައްޤީކުރުމުގެ މަސައްކަތް ކުރިއަށްގެންދަވާނޭކަމަށެވެ.
މީގެ އިތުރުން އެ މަޝްރުޢުގެ މަސައްކަތާއެކު މޫދަށް އެރޭނެ ތަނަކާއި އޮޑިދޯނިފަހަރު އެހެލާތަނެއް ހެދުމުގެ މަސައްކަތްވެސް ކުރިއަށްދާނޭކަމަށް ރައީސް ފާހަގަކުރެއްވިއެވެ.
ރައީސް ކުރިނބީ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގެ ތެރެއިން... ފޮޓޯ: ރައީސް އޮފީސް
މި ދަތުރުފުޅުގައި ވަނީ، ކުރިނބީ ސްކޫލްގެ މަލްޓިޕާޕަސް ހޯލާއި، ސިއްޙީ މަރުކަޒުގެ އައު އިމާރަތުގެ މަސައްކަތް ކުންފުނިތަކާ ހަވާލުކޮށްފައެވެ.
ސިއްހީމަރުކަޒު ތަރައްޤީކުރުމަށް ސަރުކާރުން ގެންގުޅޭ ސިޔާސަތުގެ ދަށުން މަރުކަޒަުގެ ހިދުމަތް 24 ގަޑިއިރަށް ބަދަލުކޮށް އިތުރު މުއައްޒަފުން ލައިގެން އެތަން ހިންގުމުގެ ކަންކަން ކުރިއަށްއޮތްތަނުގައި ގެންދަވާނޭނޭކަމަށް ރައީސް ވަނީ ވިދާޅުވެފައެވެ. މީގެ އިތުރުން ކުޅިވަރު ދަނޑުތަކާއި، ކުނިމެނޭޖް ކުރުމުގެ މައްސަލައަށްވެސް ކުރިއަށްއޮތްތަނުގައި ހައްލު ގެންނަވާނޭކަމަށް ރައީސް ވަނީ ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
