ދުނިޔޭގެ އެންމެ މަގްބޫލް ފަތުރުވެރިކަމުގެ މަންޒިލްގެ ގޮތުގައި ހެއްދުމުގައި ނިޝާން މުލީގޭ ޝަރަފުގެ ޢިއްޒަތުގެ ވެރިޔާ މުޙައްމަދު ޢުމަރު މަނިކުގެ ދައުރު ވަރަށް ބޮޑުކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އެމްޔޫމަނިކް އަވަހާރަވުމާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ޑރ.މުއިއްޒު ވިދާޅުވީ، އެމަނިކްފާނު އަވަހާރަވި ހަބަރު އަޑުއެއްސެވީ ވަރަށް ފުން ހިތާމައާއެކު ކަމަށެވެ.
ރައީސް ވިދާޅުވީ ރާއްޖޭގެ ފަތުރުވެރިކަން މިއަދާ ހަމައަށް ތަރައްޤީވެ ކުރިއަރައި ދިޔުމުގައި އެމްޔޫމަނިކް އަދާ ކުރައްވާފައިވަނީ، ތަޢުރީފް ޙައްޤު މަސައްކަތްޕުޅުތަކެއް ކަމަށެވެ. ރާއްޖެއަކީ ދުނިޔޭގެ ފެންވަރުގައި ފާހަގަކޮށްލެވޭ ފަތުރުވެރިންގެ ޚާއްޞަ މަންޒިލަކަށް ހެއްދެވުމުގައި އެމަނިކުފާނު ކުރެއްވި ބުރަ މަަސައްކަތްޕުޅުތަކާއި، އަދާކުރެއްވި ދައުރު ނުހަނު ބޮޑުކަމަށް ރައީސްގެ ޕޯސްޓްގައި ފާހަގަކުރެއްވިއެވެ.
އެމްޔޫމަނިކް އަވަހާރަވީ ހާލުކޮޅު ގޯސްވެ ފަރުވާދެއްވަމުން ދަނިކޮށް މިއަދު ހެނދުނުގެ ވަގުތެއްގައި ސިންގަޕޫރުގެ މައުންޓް އެލިޒަބަތު ހޮސްޕިޓަލުގައެވެ. އެމަނިކްފާނު އަވަހާރަނީ ބަލިވެ އުޅުއްވާތާ ގިނަދުވަސްތަކެއް ވަންދެން ހޮސްޕިޓަލްގައި ފަރުވާ ދެމުންދަނިކޮށެވެ.
އެމްޔޫ މަނިކް ނުވަތަ ކޮލިގޭ މުހައްމަދު އުމަރު މަނިކަކީ 1972 ވަނަ އަހަރު ރާއްޖެއަށް ފަތުރުވެރިކަން ތައާރަފްވިއިރު، އެ ސިނާއަތުގެ އެއް ބާނީއެވެ. ރާއްޖެއަށް ފަތުރުވެރިކަމުގެ ސިނާއަތް ތައާރަފްކުރެއްވުމަށް ކުރެއްވި މަސައްކަތްޕުޅުތަކައި އަދި އެ ސިނާއަތް ފުޅާކުރެއްވުމަށް އެމްޔޫމަނިކް ކުރެއްވި މިންނެތް މަސައްކަތްތައް ފާހަގަކުރުމުގެ ގޮތުން ސަރުކާރުން ވަނީ އެމަނިކްފާނަށް،
އާއްމު ހިދުމަތުގެ ހިތްވަރުދިނުމުގެ އިނާމާއި، ޝަރަފްވެރިކަމުގެ އިނާމާއި، އަދި ދިވެހި ދައުލަތުން ދެއްވާ އެންމެ މަތީ ޝަރަފް، ދިވެހި ނިޝާން މުލީގޭ ޝަރަފުގެ ޢިއްޒަތް (ނ.މ.ޝ.ޢ) އަރުފާފައެވެ.
Advertisement
This content is created and paid for by advertisers and does not involve Voice Journalists
