ރ. އިނގުރައިދޫ ލަންސިމޫގޭ މުޙައްމަދު މުސްތަފާ (ކުޑަމޯޑު) ބުނީ، މަންމަގެ ކެންސަރުގެ ދަތުރުތައް 2019 ވަނަ އަހަރުން ފެށިގެން ހަމަ ކޮންމެ އަހަރަކުހެން ކުރަމުން އަންނަ ކަމަށެވެ. އަދި ހަމަ އެހެންމެ ކޮންމެ ފަހަރަކުވެސް އާސަންދައާއި އެންސްޕާގެ އެހީތެރިކަންވެސް ލިބެމުން އަންނަ ކަމަށެވެ.

އެހެންނަމަވެސް ރަށުން މާލެ އައުމާއި މާލޭގައި މަޑުކުރުމާއި މާލެއިން އިންޑިއާއަށް ގޮސް އިންޑިއާގައި އުޅޭ އުޅުމުގައި ހޭދަވާ ހޭދަތަކަކީވެސް އިންތިހާ ތަކުލީފު ބޮޑު އަދަދުތަކަށް މުސްތަފާ އަދި މުސްތަފާގެ ޢާއިލާއަށް އޮންނަނީ ވެފައެވެ. އެހެންނަމަވެސް ފާއިތުވި ހަ އަހަރުވެސް މުސްތަފާ އަދި މުސްތަފާގެ ޢާއިލާއިން އެ ޚަރަދުތައް މެނޭޖުކުރީ ޢާއިލީ އަދި ގާތް މީހުންގެ އެހީތެރިކަމާއި އެއް ބަނޑު އެއްބަފާ ކުދިންގެ މެދުގައި އިންތިޒާމުވެގެން ނެގި ކުދި ލޯނުތަކާއި ކުދި ދަރަނިތަކުންނެވެ.

މިފަހަރު މިއޮތީ އަނެއްކާވެސް މަންމަގެ ކެންސަރު ދަތުރުގައި މުސްތޮފާ އާއި އާއިލާ އިންޑިއާއަށް ފުރަން ޖެހިފައެވެ. އާސަންދަ އާއި އެންސްޕާގެ އެހީތެރިކަން މިފަހަރުވެސް ލިބޭނެކަމާއިމެދު މުސްތޮފާ ޔަޤީން ކަށަވަރު ކުރެއެވެ. އެހެންނަމެސް ތަޖުރިބާގެ އަލީގައި މުސްތޮފާއަށް ފާހަގަވާ ކަމަކީ އިންޑިއާއަށް ދާ ކޮންމެ ދަތުރެއްގައިމެ ކީމޯ ތެރަޕީތައް ފަދަ ތެރަޕީތައް ދިނުމުގައި މަދުވެގެން 25 ވަރަކަށް ދުވަހު މަޑުކުރަން ޖެހޭ ކަމާއި އާސަންދަ އެންސްޕާއިން ލިބޭ އެހީގެ އިތުރަށްވެސް މަދުވެގެން (3،000( ތިން ހާހެއްހާ ޑޮލަރު ހޭދަވާކަމެވެ.

ރ. އިނގުރައިދޫ، ލަންސިމޫގޭ ފާޠިމަތު ހުސެއިން (މުސްތޮފާގެ މަންމަ)ގެ އިތުރު ފަރުވާއަށާއި ޓެސްޓްތައް ހެދުމަށް ވީހާވެސް އަވަހަކަށް ރާއްޖެއިން ބޭރަށް ދިއުމަށް ޑަކުޓަރުން ލަފާދީފައިވާ މި ދަނޑިވަޅުގައި މުސްތޮފާ އަދި އެ ޢާއިލާއިން އެދެނީ ރައްޔިތުންގެ ލޮބުވެތި އެހީއަކަށެވެ.

މަންމަގެ ކެންސަރު ދަތުރަށް އެހީތެރިކަމަށް އެދޭއިރު މުސްތޮއަކީ ޚާއްޝަ އެހީއަށް ބޭނުންވާ ފަރާތެއްކަން ފާހަގަކޮށްލަން ޖެހެއެވެ. އެ ތަކުލީފުތަކާއެކުވެސް މަންމައާއި ބައްޕަ އަދި މުޅި އާއިލާއަށްޓަކައި އަބަދުވެސް ޤުރުބާނީ ވުމުގައި މުސްތޮއަކީ ސާބިތުކަމުގައި ހުރި މިސާލެކެވެ. މަންމައާއި ބައްޕައަށް ވެވުނު ހުރިހާ ގޮތަކުން އެހީތެރިކަން ފޯރުކޮށްދިނުމުގެ ގާބިލުކަން މުސްތޮއަށް މިންވަރު ކުރެއްވީތީ  މާތް ﷲ އަށް މުސްތޮ ހަމްދާއި ޝުކުރު ކުރެއެވެ.