ދިވެހިރާއްޖޭގެ އެންމެބޮޑު އިންޝުއަރެންސް ކުންފުނި، އެލައިޑް އިންޝުއަރެންސްއިން ޓީޓީއެމް މޯލްޑިވްސް 2025 ގެ އޮފިޝަލް އިންޝުއަރެންސް ޕާޓްނަރެއްގެ ގޮތުގައި ހަރަކާތްތެރިވުމުގެ ދައުރު އަލުން ކަށަވަރުކޮށްފިއެވެ.

މިގޮތުން، ރާއްޖޭގެ އެންމެ ބޮޑު ޓްރެވަލް ޓްރޭޑް ޝޯގެ މުހިންމު ދެ ހަރަކާތް ކަމުގައިވާ ޓީޓީއެމް އެވޯޑްސް އެންޑް ގަލާ 2025 އަދި ޓީޓީއެމް ކަނެކްޓް މީޓިންގްސް 2025 އަށް އެހީތެރިކަން ފޯރުކޮށްދީފައިވެއެވެ.

އޯގަސްޓް 28 ވަނަ ދުވަހު އަދަރާން ސިލެކްޓް ހުދުރަންފުށީގައި ބޭއްވުނު ޓީޓީއެމް އެވޯޑްސް އެންޑް ގަލާގައި ދިވެހިރާއްޖޭގެ ހޮސްޕިޓަލިޓީ ދާއިރާގެ 28 އެވޯޑް ކެޓަގަރީން އެވޯޑްތައް ލިބުނުފަރާތްތައް ވަނީ ހޮވާފައެވެ. 

އޯގަސްޓް 27-28 ގައި ބާސެލޯ ނަސަންދުރާ މާލޭގައި ބޭއްވުނު ޓީޓީއެމް ކަނެކްޓް މީޓިންގްސް 2025 ގައި 500 އަށްވުރެ ގިނަ ޓްރެވަލް ޓްރޭޑް ޕްރޮފެޝަނަލުންނާއި 100 އަށްވުރެ ގިނަ ހޮޓެލިއަރުން ބައިވެރިވިއެވެ. އަދި 3،000 އަށްވުރެ ގިނަ ކުރިން ޝެޑިއުލްކުރެވިފައިވާ ބައްދަލުވުންތައް ބާއްވާފައިވެއެވެ. މި ބައްދަލުވުންތަކުން، އެއްބާރުލުމާއި، ވިޔަފާރި ކުރިއެރުވުމަށް މުހިންމު ފުރުސަތުތަކެއް ފަހިވެގެން ގޮސްފައިވެއެވެ.

އެލައިޑް އިންޝުއަރެންސްގެ ސޭލްސް ޓީމްތައް މި އިވެންޓުގައި ޙަރަކާތްތެރިކަމާއެކު ބައިވެރިވެ، އިންޑަސްޓްރީގެ ސްޓޭކްހޯލްޑަރުންނާއެކު މުހިންމު މަޝްވަރާތައް ކުރުމާއި ގުޅުންތައް ބަދަހިކޮށްފައިވެއެވެ. މިކަމުގެ ސަބަބުން، ފަތުރުވެރިކަމުގެ ދާއިރާގެ އިތުބާރުހުރި ޕާޓްނަރެއްގެ ގޮތުގައި އެލައިޑްގެ ދައުރު އިތުރަށް ހަރުދަނާވެގެން ދިޔަކަމަށް އެލައިޑުން ބުންޏެވެ.