މިއަހަރުގެ ދެވަނަ ކުއާޓަރު ނިމުނުއިރު ރާއްޖޭގެ ޖުމްލަ ދަރަނި 148.9 ބިލިއަން ރުފިޔާއަށް އަރާފައިވާކަމަށް މާލީ ވުޒާރާގެ ތަފާސްހިސާބުތަކުން ދައްކައިފިއެވެ.

ފިނޭންސް މިނިސްޓްރީން އާއްމުކޮށްފައިވާ ކުއާޓަރލީ ޑެޓް ބްލެޓިން ރިޕޯޓްގައިވާގޮތުން މިއަހަރުގެ ޖޫންމަހުގެ ނިޔަލަށް ރާއްޖޭގެ ޖުމްލަ ދަރަންޏަކީ 148.96 ބިލިއަން ރުފިޔާއެވެ. ރާއްޖޭގެ ދަރަނީގެ ތެރެއިން ބޮޑުބައެއް ހިއްސާކުރަނީ ރާއްޖޭގެ އެތެރެއިން ނަގާފައިވާ ދަރަންޏެވެ. އެގޮތުން އެތެރޭގެ ދަރަނި 86.6 ބިލިއަން ރުފިޔާގައި އުޅޭއިރު ބޭރުގެ ދަރަނި އުޅެނީ 62.3 ބިލިއަން ރުފިޔާގައެވެ.

އެތެރޭގެ ދަރަންޏަށް ބަލާއިރު އެންމެބޮޑު އަދަދެއް ހިއްސާކުރަނީ ކޮމާޝަލް ބޭންކްތަކަށް ދޭންޖެހޭ ފައިސާއެވެ. އެގޮތުން ބޭންކްތަކަށް ދައްކަންޖެހޭ ދަރަނީގެ އަދަދު 34.6 ބިލިއަން ރުފިޔާއަށް އަރާއިރު، އެހެނިހެން މާލީ ކުންފުނިތަކަށް ދައްކަންޖެހޭ އަދަދު 31 ބިލިއަނ ރުފިޔާއަށް އަރައެވެ. އަދި މަރުކަޒީ ބޭންކަށް ދަރާފައިވާ ދަރަނި 15.1 ބިލިއަން ރުފިޔާއަށް އަރައެވެ.

ބޭރުގެ ދަރަނީގެ ތެރެއިން އެންމެބޮޑު އަދަދެއް ދައްކަންޖެހެނީ އިންޑިއާގެ ބޭންކުތަކަށެވެ. އެގޮތުން އިންޑިއާގެ އެކްސްޕޯޓް އޮމްޕޯޓް ބޭންކް އޮފް އިންޑިއާއަށް 9.2 ބިލިއަން ޑޮލަރު ދޭންޖެހޭއިރު، ދެވަނައަށް އެންމެބޮޑު އަދަދެއް ހިއްސާކުރަނީ ދައުލަތުން ވިއްކި ބޮންޑްތަކަށް ދައްކަންޖެހޭ އަދަދެވެ. އެއީ 7.7 ބިލިއަން ރުފިޔާއެވެ. މީގެ އިތުރުން ޗައިނާގެ ބޭންކްތަކަށްވެސް 7 ބިލިއަނަށްވުރެ ގިަނ ރުފިޔާ ދަރާފައި އެބައޮތެވެ.

ކުރީ ސަރުކާރުތަކުން ވާރުވަވަމުން އައި ދަރަންޏާއެކު ރާއްޖޭގެ ޖުމްލަ ދަރަނި 148 ބިލިއަން ރުފިޔާއަށް އަރާއިރު، އަންނަ އަހަރު ބޭރުގެ ދަރަނިތައް އަދާކުރަން ސަރުކާރަށް ބިލިއަނުން ހޭދަކުރަން ޖެހޭނޭކަމަށް މާލީ ވުޒާރާގެ ހިސާބުތަކުން ދައްކައެވެ. އެގޮތުން އަންނަ އަހަރުގެ ތެރޭގައި ބޭރުގެ އެކި ފަރާތްތަކަށް ދަރަނި އަދާކުރުމަށް 1 ބިލިއަނަށްވުރެ ގިނަ ޑޮލަރު ހޭދަކުރަން ޖެހޭނޭކަމަށް މާލީ ވުޒާރާއިން ވަނީ ހާމަކޮށްފައެވެ.