ޔަހޫދީ ނިރުބަވެރި ދައުލަތް، އިޒްރޭލުގެ ޕްރޮޕަގެންޑާ ފަތުރަން ގޫގުލް އަދި ޔޫޓިއުބްއަށް 45 މިލިއަން ޑޮލަރު ދިން ކަމުގެ ލިޔެކިޔުންތަކެއް ފެންމަތިވެއްޖެއެވެ.

ބޭރުގެ ނޫސްތަކުން ރިޕޯޓުކުރާ ގޮތުން، އިޒްރޭލުގެ ސަރުކާރުގެ އެކި ވާހަކަތަކާއި ޕްރޮޕަގެންޑާތައް ފަތުރަން އިޒްރޭލުން ވަނީ "ހަސްބަރާ"ގެ ނަމުގައި ކެމްޕެއިނެއް ލޯންޗުކޮށްފައެވެ. އެ ކެމްޕެއިނުގެ ދަށުން އިޒްރޭލުން ވަނީ ދުނިޔޭގެ ހަތަރު ބޮޑު ކުންފުންޏަކަށް، އެތައް މިލިއަން ޑޮލަރު ދީފައެވެ. 

އެގޮތުން އެންމެ ބޮޑު އަދަދެއް ދީފައިވަނީ ގޫގުލްއަށެވެ. ގޫގުލްއަށް 27 މިލިއަން ޑޮލަރު ދީފައިވާއިރު، ޔޫޓިއުބްއަށް 18 މިލިއަން ޑޮލަރު، އެކްސް ނުވަތަ ކުރީގެ ޓުވިޓާއަށް ތިން މިލިއަން ޑޮލަރު އަދި ފްރާންސުގެ މަޝްހޫރު ތެޑްސްއަށް ދެ މިލިއަން ޑޮލަރު ވަނީ ދީފައެވެ.

އެ ކެމްޕެއިނުގެ ތެރެއިން ހުސްވި ޖުލައި މަހު، އިޒްރޭލުގެ ޚާރިޖީއާ ބެހޭ ވުޒާރާއިން ޔޫޓިއުބްގައި ބައެއް ވީޑިއޯތައް ކުރިއިރު، އޭގެ ތެރެއިން އެއް ވީޑިއޯގައި ޣައްޒާގައި ކާބޯތަކެތި ތިބި ކަމަށާއި، ބަނޑުހައި ހޫނުކަން ނެތް ކަމަށް ބުނެފައިވެއެވެ. އަދި އެނޫން ގޮތަކަށް ދެކެވޭ ވާހަކަތަކަކީ ދޮގެއް ކަމަށް އެ ވީޑިއޯގައި ބުނެފައިވެއެވެ.

އެހެން ނަމަވެސް ޣައްޒާގެ ބަނޑުހައި ހޫނުކަމުގެ ޙާލަތު އެންމެ ގޯސްކަމަށް އދ އިން ކަނޑައަޅާފައިވަނީ ވެސް އެ މަހުއެވެ.

އަދި ގޫގުލް މެދުވެރިކޮށް ޣައްޒާގެ ރައްޔިތުންނަށް އިންސާނީ އެހީތެރިކަން ފޯރުކޮށްދޭ އދގެ އުންރުވާއާ ދެކޮޅަށް ވެސް އިޒްރޭލުން މިދިޔަ އަހަރު ކެމްޕެއިނެއް ހިންގިކަން ވެސް ފާހަގަކޮށްލެވެއެވެ. އަދި އެ އަހަރުގެ ތެރޭގައި އުންރުވާއިން ޣައްޒާގައި ހަރަކާތްތެރިވުން މަނާކޮށް، އުންރުވާގެ ދަށުން ޣައްޒާގެ ރައްޔިތުން ދިރިއުޅުނު ގިނަ ތަންތަނަށް އިޒްރޭލުން ޙަމަލާ ވެސް ދީފައިވެއެވެ. އެ ޙަމަލާތަކުގައި އުންރުވާގެ ބައެއް މަސައްކަތްތެރީން ވެސް ވަނީ ޝަހީދުވެފައެވެ.

ގޫގުލް އަދި ޔޫޓިއުބް ފަދަ ބޮޑެތި ކުންފުނިތަކަށް އަމާޒުކުރެވޭ ތުހުމަތުތަކާ ގުޅޭ ގޮތުން އެ ކުންފުނިތަކުން މިހާތަނަށް އެއްވެސް އެއްޗެއް ބުނެފައެއް ނުވެއެވެ. އެހެން ނަމަވެސް ޣައްޒާގެ ޙާލަތު ދުވަހެއް ދުވަހަކަށް ދަށަށް ދާއިރު، މިހާތަނަށް ބަނޑުހައި ހޫނުކަމުގައި އެކަނިވެސް 360 އަށް ވުރެ ގިނަ މީހުން ވަނީ ޝަހީދުވެފައެވެ. އޭގެ ތެރޭގައި 130 އަށް ވުރެ ގިނަ ކުޑަކުދިން ހިމެނެއެވެ.

އަދި 2023 ވަނަ އަހަރުގެ އޮކްޓޯބަރު މަހު އިޒްރޭލުން ޣައްޒާއަށް ދޭން ފެށި ޙަމަލާތަކުގައި މިހާތަނަށް 64,300 ވުރެ ގިނަ މީހުން ވަނީ ޝަހީދުވެފައެވެ.