މިރޭ ފުރިހަމަ ހަނދުކޭތައްއެއް ހިފާއިރު، ކޭތަ ހިފަން ފަށާނީ ރާއްޖެ ގަޑިން 08:28 ގައެވެ. ރާއްޖެ ގަޑިން 11:11 އަކީ އެ ކޭތަ އެންމެ ބޮޑަށް ފެންނާނެ ވަގުތަށް ވާއިރު، ރާއްޖެ ގަޑިން 01:55 އާ ހަމައަށް އެ ކޭތަ ފެންނަން ހުންނާނެއެވެ. މިރޭގެ ކޭތަ ރާއްޖެއަށް ވަރަށް ރީތިކޮށް ފެންނާނޭކަމަށް މޫސުމާ ބެހޭ ޤައުމީ އިދާރާއިން ވަނީ ބުނެފައެވެ. 

އެ ކޭތައާއެކު ރާއްޖޭގެ ހުރިހާ މިސްކިތެއްގައި ކޭތަ ނަމާދު މިރޭ ކުރާއިރު، ހަނދު ކޭތައެއް ހިފާއިރު ނަމާދުގެ އިތުރުން ވެސް ކުރެވިދާނެ މުހިންމު ކަންކަން ހުރެއެވެ. 

އެގޮތުން ކޭތަ ހިފާއިރު ދުޢާކުރުމާއި ޒިކުރުކުރުމާއި އިސްތިޣުފާރުކުރުން ނުވަތަ ފާފަ ފުއްސަވަން އެދި ދެންނެވުމަކީ ވެސް ކުރެވޭނެ މުހިންމު ކަމެކެވެ. 

<br>

އެގޮތުން ހެޔޮ ދުޢާކުރުމާއި ޒިކުރުކުރުމާއި އިސްތިޣުފާރުކުރުމުގެ ގޮތުން ކިޔެވިދާނެ ދުޢާތައް:

- أَسْتَغْفِرُ اللَّهَ رَبِّي مِنْ كُلِّ ذَنْبٍ وَأَتُوبُ إِلَيْهِ

- سُبْحَانَ اللَّهِ وَالْحَمْدُ لِلَّهِ وَلَا إِلَهَ إِلَّا اللَّهُ وَاللَّهُ أَكْبَرُ

- اللَّهُمَّ إِنَّا نَعُوذُ بِكَ مِنْ عَذَابِ جَهَنَّمَ، وَمِنْ عَذَابِ الْقَبْرِ، وَمِنْ فِتْنَةِ الْمَحْيَا وَالْمَمَاتِ ، وَمِنْ شَرِّ فِتْنَةِ الْمَسِيحِ الدَّجَّالِ

އަދި ތަކްބީރު ކިޔުމާއި ސަދަޤާތްކުރުމާއި އަޅުން މިނިވަންކުރުމަކީ ވެސް ކުރުން ހެޔޮ އެދެވިގެންވާ ކަންކަމެވެ.

ފަލަކީ ހިސާބުތަކުން ދައްކާގޮތުގައި މިރޭ ދުނިޔޭގެ އެކި ހިސާބުތަކުގައި ހަނދުކޭތަ ހިފާއިރު، ރާއްޖެއަށް ބްލަޑް މޫނެއް ފެންނަން ހުންނާނެއެވެ.