ހަތިޔާރުގެ ގޮތުގައި ނިއުކްލިއާ އުފެއްދުންތައް މަދުކުރުމަށް މުހިންމު ދައުރެއް އަދާކުރަމުން އަންނަ ބައިނަލްއަޤްވާމީ ޖަމިއްޔާއެއްކަމަށްވާ، ނިއުކްލިއަރ ނޮން-ޕްރޮލިފަރޭޝަން ޓްރީޓީ (އެންޕީޓީ) އިން ވަކިވުމަށް، ބިލެއް ހުށަހެޅުމަށް އީރާނުގެ ޤާނޫނު ހަދާ މަޖިލީހުގައި މަޝްވަރާކުރަން ފަށައިފިއެވެ.

މި މަޝްވަރާތައް ފަށާފައިވަނީ މީގެ ހަފްތާތަކެއް ކުރިން އިޒްރޭލާއި އެމެރިކާއިން އީރާނުގެ ނިއުކްލިއާ އަދި އަސްކަރީ މަރުކަޒުތަކަށް ދިން ހަމަލާތަކާ ގުޅިގެންނެވެ.

އީރާނުގެ މި ނިންމުމަށް މަގުފަހިވެފައިވަނީ ޔޫރަޕިއަން ޔޫނިއަންގެ މެންބަރު ގައުމުތަކުގެ ތެރެއިން ފަރަންސޭސިވިލާތް އަދި ޖަރުމަނުވިލާތާއި އިނގިރޭސިވިލާތުން "ސްނެޕްބެކް" މެކޭނިޒަމް އެކްޓިވޭޓްކޮށް، އދ. ގެ ދަށުން އީރާނަށް ދެމުންއައި ލުއިތައް ހުއްޓާލަން ނިންމުމާއި ގުޅިގެންނެވެ. އީރާނުގެ އިސްވެރިން ބުނާ ގޮތުގައި މިއީ 2015 ވަނަ އަހަރު ވެވުނު ޖޮއިންޓް ކޮމްޕްރެހެންސިވް ޕްލޭން އޮފް އެކްޝަން (ޖޭސީޕީއޯއޭ)ގެ ނިއުކްލިއަ އެއްބަސްވުމާ ޚިލާފު ކަމެކެވެ.

އެއާއެކު އީރާނުގެ މަޖިލީހުގައި ހިމެނޭ ގިނަ މެންބަރުންނާއި ހަރުކަށި ސިޔާސަތުތަކަށް ތާއީދުކުރާ ސިޔާސީ ވެރިން ދެކޭގޮތުގައި، އެންޕީޓީން ވަކިވުމަކީ ބައިނަލްއަޤްވާމީ މުޖުތަމައު އިން އީރާނާމެދު ގެންގުޅޭ ދެފުށް ދެގޮތް ސިޔާސަތުތަކަށް ދެވޭނެ އެންމެ ރަނގަޅު ޖަވާބެވެ. ޖޫން މަހު އީރާނުގެ ނިއުކްލިއާ މަރުކަޒުތަކަށް ދެވުނު ހަމަލާތަކާ ގުޅިގެން މި ގޮވާލުން ވަނީ އިތުރަށް ބާރުވެފައެވެ.

އެންޕީޓީން އީރާނު ވަކިވެއްޖެނަމަ، އިންޓަނޭޝަނަލް އެޓޮމިކް އެނަރޖީ އޭޖެންސީ (އައިއޭއީއޭ) އިން އީރާނުގެ ނިއުކްލިއަރ ހަރަކާތްތައް މޮނިޓާކުރުމުގެ ބާރު ގެއްލި، ބައިނަލްއަޤްވާމީ ނިއުކްލިއާ ނުރައްކާތެރިކަން ހުއްޓުވުމުގެ ނިޒާމަށް ބޮޑު ލޮޅުމެއް އަރާނެ ކަމަށް  މާހިރުން ލަފާކުރެއެވެ. މީގެ އިތުރުން، ސަރަޙައްދީ ކަންބޮޑުވުންތައް އިތުރުވެ، އެހެން ގައުމުތަކުން ވެސް އެމީހުންގެ ނިއުކްލިއާ ސިޔާސަތުތައް އަލުން މުރާޖަޢާކުރުމުގެ މަސައްކަތް ކުރާނެ ކަމަށް ވެސް އެ ފަރާތްތަކުން ބުނެއެވެ.

ނަމަވެސް، އެންޕީޓީން ވަކިވާނެކަމުގެ އިންޒާރަކީ ޔޫރަޕާއި އެހެނިހެން ފަރާތްތަކަށް ފޯރުކޮށްދޭން ބޭނުންވާ ޕްރެޝަރެއް ކަމަށް ބައެއް ފަރާތްތަކުން ޤަބޫލުކުރެއެވެ.