ރާއްޖެއަށް ޒިޔާރަތްކުރި ފަތުރުވެރިންގެ އަދަދު 1.52 މިލިއަނަށް އަރައިފިއެވެ.

ފަތުރުވެރިކަމާ ބެހޭ ވުޒާރާގެ ތަފާސްހިސާބުތަކުން ދައްކާ ގޮތުން، މި އަހަރުގެ މިހާތަނަށް ރާއްޖެއަށް ވަނީ 1،520،699 ފަތުރުވެރިން ޒިޔާރަތްކޮށްފައެވެ. އެއީ ދުވާލަކަށް ބަލާއިރު އެވްރެޖް ގޮތެއްގައި 6،083 ފަތުރުވެރިންނެވެ. އަދި މަހަކަށް ބަލާއިރު އެވްރެޖް ގޮތެއްގައި 190،000 ފަތުރުވެރިންނެވެ.

ހިސާބުތަކުން ދައްކާ ގޮތުން، މި މަހުގެ މިހާތަނަށް ރާއްޖެއަށް 33،773 ފަތުރުވެރިން ޒިޔާރަތްކޮށްފައިވާއިރު، އަހަރުގެ މިހާތަނަށް އެންމެ ގިނައިން ޒިޔާރަތްކޮށްފައިވަނީ ޗައިނާގެ ފަތުރުވެރިންނެވެ. ޗައިނާގެ 240،828 ފަތުރުވެރިން ޒިޔާރަތް ކޮށްފައިވާއިރު، ދެވަނައަށް އެންމެ ގިނައިން ޒިޔާރަތްކުރި ރަޝިއާއިން 182،315 ފަތުރުވެރިއަކު ވަނީ ޒިޔާރަތްކޮށްފައެވެ.

ތިންވަނައަށް އެންމެ ގިނައިން ޒިޔާރަތްކުރީ 136،619 ފަތުރުވެރިއަކު ޒިޔާރަތްކޮށްފައިވާއިރު، ހަތަރުވަނައަށް އެންމެ ގިނައިން ޒިޔާރަތްކުރި އިޓަލީން 107،736 ފަތުރުވެރިއަކު ވަނީ ޒިޔާރަތްކޮށްފައެވެ.

މި އަހަރުގެ މިހާތަނަށް 1.5 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، އެއީ މިދިޔަ އަހަރުގެ މި މުއްދަތުގައި ރާއްޖެއަށް ޒިޔާރަތްކުރި ފަތުރުވެރިންނަށް ވުރެ 9.7 އިންސައްތަ އިތުރު އަދަދެކެވެ. 

އަހަރުގެ ބާކީ ތިން މަސް އޮތް އިރު، ސަރުކާރުގެ އަމާޒަކީ ދެ މިލިއަން ފަތުރުވެރިން ރާއްޖެއަށް މި އަހަރުގެ ތެރޭގައި ގެނައުމެވެ. ކުރިޔަށް ރާއްޖޭގެ ޕީކް ސީޒަން އޮތުމާއެކު ވެސް، ދުވާލެއްގެ މައްޗަށް ޒިޔާރަތްކުރާ ފަތުރުވެރިންގެ އަދަދަށް ބަލާއިރު، ސަރުކާރުން މި އަހަރަށް އަމާޒު ހިފައިފައިވާ ދެ މިލިއަން ފަތުރުވެރިންގެ އަދަދަށް ވުރެ ރާއްޖެއަށް ޒިޔާރަތް ކުރާނެ ފަތުރުވެރިންގެ އަދަދު އިތުރުވާނެ ކަމަށް ލަފާކުރެވެއެވެ.