ނޭޕާލްގައި ޖެންޒީން ކުރަމުންގެންދާ މުޒާހަރާތަކަށް ތާއީދުކުރުމުގެ ގޮތުން އެމެރިކާގައި ދިރިއުޅެމުންދާ ގިނަ އަދަދެއްގެ ނޭޕާލް ރައްޔިތުން މަގުތަކަށް އެއްވުމަކަށް ނިކުމެއްޖެއެވެ.
ނޭޕާލްގައި ސޯޝަލް މީޑިއާގެ ޕްލެޓްފޯމްތައް ބޭނުންނުކުރެވޭގޮތަށް ސަރުކާރުން ނިންމުމާއި، އަދި ސަރުކާރުގެ ވެރިން ކޮރަޕްޝަނާ ދެކޮޅަށް އެޤައުމުގެ ޖެންޒީން ވަނީ ކަތަމަންޑޫގެ އެކި ސަރަހައްދުތަކުގައި މުޒާހަރާތައް ފަށާފައެވެ. މި މުޒާހަރާތައް ހޫނުވެ، 19 މީހަކު މަރުވެފައިވާއިރު، 400 އަށްވުރެ ގިނަ މީހުންނަށް ވަނީ އެކިވަރުގެ އަނިޔާތައް ލިބިފައެވެ.
އެމެރިކާގައި ދިރިއުޅެމުންދާ ނޭޕާލަށް ނިސްބަތްވާ ރައްޔިތުން ޖެންޒީންގެ ހަރަކާތްތަކަށް ތާއީދުކުރުމުގެ ގޮތުން އެއްވުމެއް ރޭ ބާއްވާފައިވާއިރު، އެމީހުން ވަނީ އެ އެއްވުމުގައި މަރުވެދިޔަ މީހުނަށް އިންސާފް ހޯދައިދިނުމަށް ގޮވާލާފައެވެ. މީގެ އިތުރުން ސަލާމަތީ ބާރުތަކުން ހައްދެއްނެތް މިންވަރަށް ޒުވާނުންނާ ދެކޮޅަށް ބާރުގެ ބޭނުން ނުކުރުމަށްވެސް ވަނީ ގޮވާލާފައެވެ.
ނޭޕާލްގެ މުޒާހަރާތައް ހޫނުވެ އެންމެފަހުން ކަތަމަންޑޫގެ ގިނަ ސަރަހައްދުތަކެއްގައި ކާފިއު އިއުލާނުކޮށްފައިވާއިރު، އަދިވެސް މުޒާހަރާތައް އަދިވެސް ދަނީ ކުރިއަށެވެ.
ސޯޝަލް މީޑިއާ ޕްލެޓްފޯމްތަކާއި ސަރުކާރުގެ ކޮރަޕްޝަނާ ދެކޮޅަށް ނޭޕާލުގެ ވެރިރަށް ކަތަމަންޑޫގައި ޖެންޒީން ފަށާފައިވާ މުޒާހަރާތައް ހޫނުވު، ގިނަ އަދަދެއްގެ ބަޔަކު މަރުވުމާ ގުޅިގެން އެޤައުމުގެ ދާހިލީ ވަޒީރު ރަމޭޝް ލެހާކް އިއްޔެ ވަނީ އިސްތިއުފާ ދެއްވާފައެވެ.މީޑިއާގެ ރިޕޯޓްތައް ބުނާގޮތުގައި ދާހިލީ ވަޒީރު އިސްތިއުފާދެއްވުމުގެ މައިގަނޑު ސަބަބަކީ މޫޒާހަރާތައް ހޫނުވެ، މީހުންގެ ފުރާނަ ގެއްލުމާއި، އާއްމުންގެ މުދަލަށާއި، އެނޫންވެސް ބޮޑެތި ގެއްލުންތައް ވާން ފެށުމުންނެވެ.
ސޯޝަލް މީޑިއާގެ ޕްލެޓްފޯމްތައް ބަންދުކުރުމާ ދެކޮޅު ހެދުމުގެ އިތުރުން ޖެންޒީން މަގުތަކަށް ނިކުތީ ސަރުކާރުގެ އޮފިޝަލުން ޒިންމާދާރުކުރުވުމަށް ގޮވާލާ ކެމްޕެއިނެއް ކުރިއަށްގެންދިއުމަށެވެ. ނަމަވެސް ވަކި ހިސާބަކުން ސުލްހަވެރި އިހުތިޖާޖުކުރުން މުޒާހަރާތަކަށް ބަދަލުވެ، އެންމެފަހުން މުޒާހަރާތައް ވަނީ ކަތަމަންޑޫގެ އެކި ހިސާބުތަކަށް ފެތުރިގެން ގޮސްފައެވެ.
Advertisement
This content is created and paid for by advertisers and does not involve Voice Journalists
