ސަރުކާރުން ސޯޝަލް މީޑިއާ އަލުން އިއާދަކުރިނަމަވެސް ނޭޕާލްގައި ކުރިއަށްދާ މުޒާހަރާތައް ހުއްޓާނުލާނޭކަމަށް މުޒާހަރާގެ ބައިވެރިން ބުނެފިއެވެ.
ނޭޕާލްގެ ވެރިރަށް ކަތަމަންޑޫގައި ފެށި މުޒާހަރާ ހޫނުވެގެންގޮސް އެންމެފަހުން ވޭތުވެދިޔަ 24 ގަޑިއިރުގެ ތެރޭގައި ވަނީ 19 މީހަކު މަރުވެ، އެތައްބަޔަކަށް އަނިޔާވެފައެވެ. މުޒާހަރާ ހޫނުވެ އެންމެފަހުން ބަޔަކު މަރުވުމާ ގުޅިގެން ނޭޕާލް ސަރުކާރުން ރޭގެ ވަގުތެއްގައި ވަނީ ސޯޝަލް މީޑިއާ އަލުން ބޭނުންކުރެވޭގޮތް ހަދާފައެވެ.
މިކަމާ ގުޅޭގޮތުން ޖެންޒީ މުޒާހަރާގެ ބައިވެރިން ބުނެފައިވަނީ ސޯޝަލް މީޑިއާ އަލުން އިއާދަކުރިނަމަވެސް މުޒާހަރާތައް ހުއްޓާލުމެއްނެތް ކަމަށާއި، ގެއަށް ވަންނާނީ ކޮރަޕްޓް މުއައްސަސާތަކުގައި ތިބިވެރިން އިސްތިއުފާދިނުމުންކަމަށެވެ. މުޒަހަރާގެ ބައިވެރިން މިއަދު ހެނދުނު ވަނީ ބޮޑުވަޒީރު ކޭޕީ ޝަރުމާ ދިރިއުޅުއްވާ ގެކޮޅު ކައިރިއަށް އެއްވެފައެވެ. މުޒާހަރާގެ ބައިވެރިން ބޮޑުވަޒީރުގެ ގެކޮޅުކައިރިއަށް އެއްވުމަށްފަހު ގޮވަމުންދިޔައީ އެމީހުންގެ ޑިމާންޑްތަކަށް އިޖާބަދިނުމަށެވެ. އަދި ފުލުހުން މުޒާހަރާގެ ބައިވެރިންނާ ކުރިމަތިލުމުގައި އިންސާނީ ކަރާމާތައް ބެލުމަށްވެސް ބައިވެރިން ވަނީ ގޮވާލާފައެވެ. ބައެއް ބައިވެރިން ވަނީ ބޮޑުވަޒީރުގެ އިސްތިއުފާއަށްވެސް ގޮވާލާފައެވެ.
ނޭޕާލްގައި ކުރަމުންގެންދާ މުޒާހަރާތައް ކަތަމަންޑޫގެ އެކި ސަރަހައްދުތަކަށް ފެތުރިފައިވާއިރު، މުޒާހަރާއަށް ތާއީދުކޮށް ނޭޕާލްގެ ރައްޔިތުން ދަނީ އެމެރިކާ ފަދަ ޤައުމުތަކުގައިވެސް އެއްވުންތައް ބާއްވަމުންނެވެ.
ސަރުކާރުން ސޯޝަލް މީޑިއާ މަނާކުރުމާއި އަދި ވެރިކަމުގެ ނިޒާމުގެ ތެރޭގައި ކޮރަޕްޝަން އިންތިހާއަށް އިތުރުވެއްޖެކަމަށްބުނެ ނޭޕާލްގައި ކުރިއަށްގެންދާ މުޒާހަރާގައި އިސްކޮށްތިބީ ޒުވާނުންނެވެ. ހާއްސަ ގޮތެއްގައި މި މުޒާހަރާގައި ނަގާކިޔަންތިބީ ކޮލެޖްތަކާއި ޔުނިވަރސިޓީތަކުގައި ކިޔަވަމުންދާ ދަރިވަރުންނެވެ.
މުޒާހަރާއާ ގުޅިގެން ކަތަމަންޑޫގެ ސްކޫލްތަކާއި ކޮލެޖްތަކުގެ އިތުރުްން ޔުނިވަރސިޓީތައް ވަނީ ބަންދުކޮށްފައެވެ. އަދި އެތަންތަނުގެ ޓެސްޓްތައްވެސް ވަނީ ފަސްކޮށްފައެވެ.
Advertisement
This content is created and paid for by advertisers and does not involve Voice Journalists
