އަލީބާބާގައި ދިވެހިންގެ އުފެއްދުންތައް ވިއްކުމަށް ފުރުސަތު ފަހިވަނީ
ދުނިޔޭގެ އެންމެ ބޮޑު އީ ކޮމާސްޕްލެޓްފޯމް، އަލީބާބާގައި ދިވެހި އުފެއްދުންތައް ވިއްކުމުގެ ފުރުސަތު ތަނަވަސްކޮށްދިނުމުގެ މަސައްކަތް ސަރުކާރުން ފަށައިފިއެވެ.
މިކަމާ ގުޅޭގޮތުން އެކްސްގައި ކުރި ޕޯސްޓެއްގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، ދުނިޔޭގެ ނަން މަޝްހޫރު އީކޮމަރސް ޕްލެޓްފޯމްތަކާއެކު ކުރެވެމުންދާ މަސައްކަތްތަކުގެ ތެރެއިން ރާއްޖޭގެ އީކޮމާރސް އަދި އޮންލައިން ވިޔަފާރިކުރާ އަދި އެކަމަށް ޝައުގުވެރިވާ ފަރާތްތަކަށް ޙާއްސަކޮށްގެން މިމަހުގެ 16 ވަނަ ދުވަހު އޮންލައިން ވޯކްޝޮޕެއް ބޭއްވުމަށްވަނީ ހަމަޖެހިފައިވާ ކަމަށެވެ. މި ވޯކްޝޮޕްގައި މަޢުލޫމާތު ހިއްސާކުރާނީ އަލީބާބާ.ކޮމް ގެ އެކްސްޕާރޓުން ކަމަށް މިނިސްޓަރު ވިދާޅުވިއެވެ.
މިނިސްޓަރު ސައީދު ވިދާޅުވީ، އިކޮނޮމިކް މިނިސްޓްރީ އާއި އަލީބާބާ.ކޮމް އާއެކު ކުރެވުނު މަސައްކަތުގެ ސަބަބުން ދިވެހީންގެ ތެރޭގައި އޮންލައިން ވިޔަފާރިކުރަން ބޭނުންވާ ފަރާތްތަކަށް އަލީބާބާ.ކޮމްގެ ޕްލެޓްފޯމްގައި އެފަރާތްތަކުގެ މުދާ އޮންލައިންކޮށް ވިއްކޭނެ ގޮތަށް، ސެލާރ އެކައުންޓް ހުޅުވޭނެ ފުރުސަތު ފަހިވެގެންދާނޭ ކަމަށެވެ.
މިއީ ބޭރުގެ އީކޮމާރސް ޕްލެޓްފޯމްތަކުގައި ދިވެހީންނަށް އެމީހުންގެ އުފެއްދުންތައް މި ޕްލެޓްފޯމްތަކުގައި އޮންލައިން ވިޔަފާރި ކުރެވޭނެގޮތް ހަމަޖައްސަވައިދެއްވުމަށް، ވެވަޑައިގެންނެވި ވަޢުދުފުޅު ފުއްދެވުމުގެ މަސައްކަތްކުރުމުގެ ތެރެއިން ކުރެވެމުންދާ މަސައްކަތެއްކަމަށްވެސް މިނިސްޓަރު ފާހަގަކުރެއްވިއެވެ.
އޮންލައިން ވިޔަފާރިއަކީ މިހާރު ރާއްޖޭގައި އެންމެ ފުޅާދާއިރާއެއްގައި ކުރިއަރަމުން އަންނަ ވިޔަފާރިކަމަށް އިގްތިސާދީ ވުޒާރާއިން ބުނެއެވެ. އަދި ކުދ އަދި މެދުފަންތީގެ ވިޔަފާރިވެރިން އެންމެގިނައިން ހަރަކާތްތެރިވާ އެއް ދާއިރާއަކީވެސް އޮންލައިން ވިޔަފާރިއެވެ. އެގޮތުން ރާއްޖޭގައި ތަކެތި އުފައްދައިގެން އޮންލައިނުކޮށް ތަކެތިވިއްކާ ފަރާތްތަކުގެ 400 އަށްވުރެ މަތިވާނޭކަމަށް އިކޮނޮމިކް މިނިސްޓަރު ވަނީ މީގެކުރިން ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
