އިނގިރޭސި ޕްރިމިއާ ލީގްގައި އާސެނަލް މާދަމާ ފޮރެސްޓާ ދެކޮޅަށް ނިކުންނައިރު، އަނިޔާގެ ސަބަބުން ޓީމާ ދުރުގައިތިބި މުހިންމު ބައެއް ކުޅުންތެރިން ފަރިތަކުރުންތަކުގައި ބައިވެރިވާން ފަށާފައިވާކަމަށް އާސެނަލްގެ ކޯޗް މިކޭލް އަޓޭޓާ ބުނެފިއެވެ.
މާދަމާގެ މެޗާ ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން އަޓޭޓާ ބުނީ، އޭނާގެ ޓީމަށް މިވަގުތު ލިބިފައިވާ އެންމެބޮޑު ހިތްހަމަ ޖެހުމަކީ، އަނިޔާގައިތިބި ކުޅުންތެރިންގެ ތެރެއިން، ވިލިއަމް ސާލިބާ އާއި ބެން ވައިޓް ޓީމާ ގުޅުންކަމަށެވެ. އަޓޭތާ ބުނީ އެ ދެކުޅުންތެރިންވެސް އާސެނަލްގެ ފަރިތަކުރުންތަކުގައި ފުލްކޮށް ބައިވެރިވާން ފަށާފައިވާކަމަށެވެ. މިއީ ލިބިގެންދިޔަ ވަރަށްބޮޑު ހިތްހަމަ ޖެހުމެއްކަމަށް އަޓޭޓާ ފާހަގަކުރިއެވެ. މީގެ އިތުރުން ނޯގާޑުވެސް މިހާރު ހުރީ ފަރިތަކުރުންތަކުގައި ބައިވެރިވެވޭ ހާލަތުގައެވެ.
ނަމަވެސް ކުރިއަށްހުރު މެޗްތަކުގައި އެ ކުޅުންތެރިން ބޭނުންކުރާނޭކަމުގެ އިޝާރާތެއް އަޓޭޓާ ދީފައެއް ނުވެއެވެ.
ސާލިބާގެ ފަޔަށް އަނިޔާވީ އާސެނަލް އެންމެފަހުން ލިވަޕޫލާ ދެކޮޅަށް ނުކުތުމުގެ ކުރިން ބޭއްވި ފަރިތަކުރުންތަކުގައެވެ. ލިވަޕޫލާ ދެކޮޅަށް ކުޅުނުމެޗަށް ސާލިބާ ކުޅެން އެރިނަމަވެސް ފަޔަށް ތަދުވާވަރުން އޭނާ ވަނީ ބަދަލުކޮށްފައެވެ.
އާސެނަލްގެ ކޯޗް އަޓޭޓާއަށް އަދިވެސް އޮތް އެންމެ ބޮޑު ބޮލުގެ ރިހުމަކީ އަނިޔާގެ ސަބަބުން ޓީމްގެ މުހިންމު ގިނަ ކުޅުންތެރިންތަކެއް ޓީމާ ދުރުގައިތިބުމެވެ. އާސެނަލަށް ކުރިއަށްއޮތް ހަފްތާގައި މުހިއްމު މެޗްތަކެއް ހުރިއިރު، އެންމެ ފާހަގަކޮށްލެވެނީ، އެތްލެޓިކް ކްލަބް އަދި މެންޗެސްޓަރ ސިޓީއާ ދެކޮޅަށް ކުޅޭ މެޗެވެ.
އިނގިރޭސި ޕްރިމިއާ ލީގްގައި އާސެނަލް މިވަގުތު އޮތީ ކުޅުނު ތިންމެޗުން ލިބުނު 6 ޕޮއިންޓާއެކު ތާވަލުގެ ތިން ވަނާގައެވެ. ޕްރިމިއާ ލީގްގައި އާސެނަލް ބަލިވީ އެންމެފަހުން އެންފީލްޑްގައި ލިވަޕޫލާ ދެކޮޅަށް ކުޅުނު މެޗުންނެވެ.
Advertisement
This content is created and paid for by advertisers and does not involve Voice Journalists
