ރާއްޖޭގައި ބޭއްވުމަށް ނިންމާފައިވާ އަލީބާބާ ވޯކްޝޮޮޕަށް ދިވެހި ވިޔަފާރިތަކުގެ ބޮޑު ތަރުހީބެއް ލިބެމުން އަންނަކަމަށް އިކޮނޮމިކް މިނިޓަރު މުހައްމަދު ސައީދު ވިދާޅުވެއްޖެއެވެ.

ރާއްޖޭގެ ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ސަރުކާރުން ކުރަމުން ކުރިއަށްގެންދާ މަސައްކަތްތަކުގެ ދަށުން އިކޮނޮމިކް މިނިސްޓްރީން ވަނީ ރާއްޖޭގެ އީކޮމާރސް އަދި އޮންލައިން ވިޔަފާރިކުރާ އަދި އެކަމަށް ޝައުގުވެރިވާ ފަރާތްތަކަށް ޙާއްސަކޮށްގެން މިމަހުގެ 16 ވަނަ ދުވަހު އޮންލައިން ވޯކްޝޮޕެއް ބޭއްވުމަށް ތާވަލްކޮށްފައެވެ. މި ވޯކްޝޮޕްގައި މައުލޫމާތު ދިނުމަށް ހަމަޖެހިފައިވަނީ ދުނިޔޭގެ އެންމެބޮޑު އޮންލައިން ވިޔަފާރި އަލީ ބާބާގެ ފަރާތުންނެވެ.

މިކަމާ ގުޅޭގޮތުން އިކޮނޮމިކް މިނިސްޓަރު މުހައްމަދު ސައީދު އެކްސްގައި ކުރެއްވި ޕޯސްޓެއްގައި ވިދާޅުވީ، މި ވޯކްޝޮޕްގައި ބައިވެރިވުމަށް މިހާރުވެސް 450 ހަށްވުރެ ގިނަ ފަރާތުން ހުށަހަޅާފައިވާކަމަށެވެ. މީގެ ތެރޭގައި އަލަށް ވިޔަފާރި ފެށި ފަރާތްތަކުގެ  އިތުރުން ކުދި އަދި މެދުފަންތީގެ ވިޔަފާރިތަކާއި، ބޭންކްތަކާއި، ލޮޖިސްޓިކްސް ހިދުމަތްދޭ ފަރާތްތައް ފާހަގަކޮށްލެވެއެވެ.

އިކޮނޮމިކް މިނިސްޓަރު މުހައްމަދު ސައީދު ވަނީ އަލީބާބާގެ މި ވޯކްޝޮޕާއެކު އެ ޕްލެޓްފޯމުގައި ރާއްޖޭގެ ވިޔަފާރިތަކަށް ލިސްޓްކުރުމުގެ ފުރުސަތު ފަހިވެގެންދާނޭކަން ހާމަކުރައްވާފައެވެ.

އޮންލައިން ވިޔަފާރިއަކީ މިހާރު ރާއްޖޭގައި އެންމެ ފުޅާދާއިރާއެއްގައި ކުރިއަރަމުން އަންނަ ވިޔަފާރިކަމަށް އިގްތިސާދީ ވުޒާރާއިން ބުނެއެވެ. އަދި ކުދ އަދި މެދުފަންތީގެ ވިޔަފާރިވެރިން އެންމެގިނައިން ހަރަކާތްތެރިވާ އެއް ދާއިރާއަކީވެސް އޮންލައިން ވިޔަފާރިއެވެ. އެގޮތުން ރާއްޖޭގައި ތަކެތި އުފައްދައިގެން އޮންލައިނުކޮށް ތަކެތިވިއްކާ ފަރާތްތަކުގެ 400 އަށްވުރެ މަތިވާނޭކަމަށް އިކޮނޮމިކް މިނިސްޓަރު ވަނީ މީގެކުރިން ވިދާޅުވެފައެވެ.