މިއަހަރުގެ ފުޓްބޯޅަ ސީޒަން ހުޅުވުމުގެ ގޮތުން ކުޅުނުމެޗް މާޒިޔާ ސްޕޯޓްސް ކާމިޔާބުކޮށްފިއެވެ.
ގަލޮޅުދަނޑުގައި ރޭ ކުޅުނު މިމެޗް މާޒިޔާ ކާމިޔާބުކުރީ، އީގަލްސްއާ ދެކޮޅަށް ކުޅުނުމެޗް 0-2 ގެ ނަތީޖާއަކުން ކާމިޔާބުކޮށްގެންނެވެ. މެޗްގައި އެންމެ ފުރަތަމަ މާޒިޔާއިން ލީޑް ނަގާފައިވަނީ، ފުރަތަމަ ހާފް ނިމެން އުޅެނިކޮށް 45 ވަނަ މިނެޓް ތެރޭގައެވެ. މި ލަނޑު އެޓީމަށް ކާމިޔާބުކޮށްދިނީ އަހުމަދު އައިހަމްއެވެ. މެޗްގައި މާޒިޔާއިން ޖެހި ދެވަނަ ލަނޑު އެޓީމުން ކާމިޔާބުކުރީ ދެވަނަ ހާފްގައި ހަސަން ނާއިޒް (ދާދު) އެވެ.
އަނިޔށގެ ސަބަބުން އީގަލްސް އާ ދެކޮޅަށް މާޒިޔާއިން ނިކުތީ އެޓީމުގެ ކެޕްޓަން ސަމޫހު އަލީ (ސަމުއްޓެ) ނުލައެވެ.
މި ސީޒަނުގެ ކޮމިޔުނިޓީ ޝީލްޑް މާޒިޔާއިން ކާމިޔާބުކޮށްފައިވާއިރު، އެޓީމަކީ މިހާރުވެސް ކޮމިޔުނިޓީ ޝީލްޑް އެންމެ ގިނައިން ކާމިޔާބުކުރި ޓީމެވެ. މާޒިޔާއިން ވަނީ ކޮމިޔުނިޓީ ޝީލްޑް ޖުމްލަ 6 ފަހަރެއްގެ މަތިން ކާމިޔާބުކޮށްފައެވެ. ރޭގެ މެޗް ކާމިޔާބުކުރުމާ ގުޅީގެން އިނާމުގެ ގޮތުގައި އެޓީމަށް ވަނީ 100،000 ރުފިޔާގެ ފައިސާގެ އިނާމް ލިބިފައެވެ. މާޒިޔާއަށް ލިބުނު ފައިސާގެ ތެރެއިން ބައެއް ހަދިޔާކުރުމަށް ނިންމާފައިވަނީ ލޯފަން މީހުންގެ ޖަމިއްޔާ (ބީވީއައިއެސްއެމް) އަށެވެ.
ދިވެހި ޕްރިމިއާ ލީގްގެ ކުޅުން ތިން ދުވަހަށްފަހު ފަށާއިރު، އެމެޗްގައިވެސް މާޒިޔާ ނިކުންނާނީ އީގަލްސް އާ ދެކޮޅަށެވެ. މިމެޗް ކުޅުމަށް ތާވަލްކޮށްފައިވަނީ އަންނަ ބްރާސްފަތިދުވަހުގެ ރޭ ގަލޮޅު ދަނޑުގައެވެ.
Advertisement
This content is created and paid for by advertisers and does not involve Voice Journalists
