ރާއްޖޭގެ ހުރިހާ އަތޮޅަކުން އައިޑީކާޑު ހައްދައިދިނުމުގެ އިންތިޒާމް ގާއިމްކޮށް ނިންމުމަށް ސަރުކާރުން ހިސާބުޖެހި މުއްދަތަށްވުރެ އަވަހަށް އެކަންކޮށް ނިންމައިފިއެވެ.
މިދިޔަ އަހަރުގެ ޖުމްހޫރީދުވަހުގެ ޖަލްސާގައި ވާހަކަފުޅު ދައްކަވަމުން ރައީސް ޑރ.މުހައްމަދު މުއިއްޒު ވަނީ މިއަހަރުގެ ނިޔަލަށް ހުރިހާ އަތޮޅަކުން އައިޑީކާޑާއި ޕާސްޕޯޓް ހައްދައިދިނުމުގެ އިންތިޒާމް ހަމަޖައްސައިދީ ނިންމަވާނޭ ކަމަށެވެ. ސަރުކާރުން މިއަދު ވަނީ ވ.އަތޮޅު ފެލިދޫގައި އައިޑީކާޑު ހެދުމުގެ އިންތިޒާމް ހަމަޖައްސައި ރަސްމީކޮށް އެރަށުން އައިޑީކާޑް ހައްދައިދޭން ފަށާފައެވެ.
ފެލިދޫން އައިޑީކާޑު ދޫކުރުން ފައްޓަވައިދެއްވީ ރައީސް ޑރ.މުހައްމަދު މުއިއްޒު މިހާރު ވ އަތޮޅަށް ކުރައްވަމުން ގެންދަވާ ޒިޔާރަތުގައި ފެލިދޫއަށް ވަޑައިގެން މިރޭ އެރަށުގައި ބޭއްވި ރަސްމިއްޔާތެއްގައެވެ. އައިޑީކާޑް ދޫކުރުން ރަސްމީކޮށް ފައްޓައިވައިދެއްވީ މާލީ ވަޒީރު މޫސާ ޒަމީރެވެ.
ފެލިދޫ ރައްޔިތުންނާ ބައްދަލުކޮށްލެއްވުމަށް ބޭއްވި ޖަލްސާގައި ވާހަކަދައްކަވަމުން ރައީސް ވިދާޅުވީ، މިހާރު ކޮންމެ އަތޮޅަކުންވެސް އައިޑީކާޑު ދޫކުރަމުންދާނޭކަމަށާއި، އަންނަމަސް ނިމުމުގެ ކުރިން ކޮންމެ އަތޮޅަކުން ޕާސްޕޯޓް ދޫކުރަންވެސް ފެށޭނޭކަމަށެވެ. އެހެންކަމުން މި ވައުދުވެސް ނިމިގެން މިދިޔައީ ކަނޑައެޅި ތާރީހަށްވުރެ ދެމަސްދުވަސް ކުރިންކަމަށް ރައީސް ފާހަގަކުރެއްވިއެވެ.
ކުރީގައި މި ވާ ގޮތަކީ މާލެއަށް ހުރިހާ ކަމެއްގައި ބަރޯސާވާން މިޖެހެނީ. މިއީ އަޅުގަނޑު ގަބޫލުކުރާ ހަމައެއް ނޫން. އެހެންވީމާ އޭޓީއެމް ވެސް ކޮންމެ ރަށެއްގައި މި ހަދަނީ.
ރައީސް ވިދާޅުވިއެވެ
ރައީސް ޑރ.މުއިއްޒު ވިދާޅުވީ ރައްޔިތުންނަށް ބޭނުންވާ ކަންކަން ރައްޔިތުންނާ ވީހާވެސް ކައިރިން ފޯރުކޮށްދިނުމަކީ އެމަނިކްފާނު އެންމެ އިސްކަންދޭ އެއް ކަންތައްކަމަށެވެ. އެގޮތުން ހުރިހާ ކަމެއްވެސް ވީ ވައުދާ އެއްގޮތަށް ކުރިއަށްދާނޭކަން ރައީސްގެ ވާހަކަފުޅުގައި ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
