މ. ދިއްގަރުގައި އެޅުމަށް ނިންމާފައިވާ 75 ހައުސިން ޔުނިޓުގެ ޢަމަލީ މަސައްކަތްތައް މި އަހަރު ފެށޭނެކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.

މ. އަތޮޅަށް ކުރައްވަމުންގެންދަވާ ދަތުރުުފުޅުގެ ތެރެއިން ދިއްގަރުގެ ރައްޔިތުންނާއި ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ، އެރަށުގައި ކުރުމަށް ވައުދުވީ ކަންތައްތަކުގެ ތެރެއިން ހޮސްޕިޓަލު އިމާރަތްކުރުމާއި  ބޯހިޔާވަހިކަމުގެ މައްސަލައަށް ހައްލެއް ހޯއްދެވުމަށް އެމަނިކުފާނު ވަރަށް އިސްކަންދެއްވާ ކަމަށެވެ.

އެގޮތުން ދިއްގަރުގައި 75 ހައުސިން ޔުނިޓު ޤާއިމްކުރުމަށް އެމްޓީސީސީއާ މިދިޔަ އަހަރުގެ އޭޕްރީލް މަހުގެ ތެރޭގައި ހަވާލުކުރި މަޝްރޫއަށް އިޝާރަތްކުރައްވަމުން ރައީސް ވިދާޅުވީ، އެ މަޝްރޫއުގައި ވާން ޖެހޭ ހުރިހާ ކަންތައްތަކެއް ވެފައިވާ ކަމަށާއި މި އަހަރު ތެރޭގައި މި މަޝްރޫއުގެ ތެރެއިން މަސައްކަތް ފެށޭނެ ކަމަށެވެ.

ރައީސް ވަނީ އެ މަޝްރޫއު ނިމުމުގެ ކުރިން ދިއްގަރުގައި އިތުރު 75 ހައުސިން ޔުނިޓު އެޅުމުގެ މަޝްރޫއެއް ވެސް ފަށަން ގަސްތުކުރައްވާފައިވާކަން އިއުލާނުކުރައްވާފައެވެ. އަދި އެކަންކުރުމަށްޓަކައި ސަރުކާރުގެ އިދާރާތަކުން މުހިންމު މަސައްކަތްތަކެއް މިހާރު ކުރަމުންދާ ކަމަށް ރައީސް ވިދާޅުވިއެވެ.

ދިއްގަރުގެ 75 ހައުސިންގެ މަޝްރޫއުގެ ވާހަކަ ރައީސް ފާހަގަކުރެއްވިއިރު، ދިވެހި ސަރުކާރުންނާއި ޕީއެސްޕީން ހަރަދުކޮށްގެން ހިންގާ މި މަޝްރުއުގެ މަސައްކަތް އެމްޓީސީސީއާއި ހަވާލުކުރީ 117 މިލިއަން ރުފިޔާއަށް ޖުމްލަ 420 ދުވަސް ތެރޭގައި މަސައްކަތް ނިންމައި ހަވާލުކުރާ ގޮތަށެވެ.

މި މަޝްރޫއުގެ ދަށުން ތިން ކޮޓަރިއާއި ތިން ފާހާނާ އަދި ސިޓިން ރޫމާއި ބަދިގޭގެ އިތުރުން ސްޓޯރ ރޫމާއި، ލޯންޑްރީ އާއި ކާގެ ހިމެނޭ ގޮތަށް 1،000 އަކަފޫޓު ކޮންމެ އެޕާޓުމަންޓެއްގައި ހުންނަންޖެހެއެވެ.