އެމްޑީޕީން މިރޭ ބާއްވާ މުޒާހަރާއަށް ރަށްރަށުން ގިނަ ބަޔަކު މާލެ އަރައިިފި
އިދިކޮޅު އެންމެބޮޑު ޕާޓީ، އެމްޑީޕީން މިރޭ ބޭއްވުމަށް ތައްޔާރުވަމުންދާ މުޒާހަރާއަށް އެޕާޓީއަށް ތާއީދުކުރާ ގިނަ ބަޔަކު މާލެ އަރައިިފިއެވެ
އެމްޑީޕީން އާޓިފޝަލް ބީޗްގައި ބޭއްވުމަށް ހަމަޖެހިފައިވާ މި މުޒާހަރާގައި ބައިވެރިވުމަށް ގިނަ ބަޔަކު މިއަދު މެންދުރުފަހު ވަނީ ލޯންޗުތަކުގައި މާލެ އައިސްފައެވެ. އަތޮޅުތެރެއިން މާލެ އެރި އެމްޑީޕީއަށް ތާއީދުކުރާ ފަރާތްތައް ބޭލުމަށް އެޕާޓީގެ ލީޑަރރޝިޕްގެ ފަރާތުން ގޮސްފައިވާއިރު، މީގެ ތެރޭގައި ރައްޔިތުން މަޖިލީހުގައި އެމްޑީޕީ ތަމްސލްކުރާ މެމްބަރުންވެސް ގޮސް ތިއްބެވެ.
އެމްޑީޕީގެ މުޒާހަރާގައި ބައިވެރިވުމަށް އައި ބަޔަކު ލޯންޗުން ފައިބަނީ
އެމްޑީޕީ މުޒާހަރާ ފެށުމަށް ހަމަޖެހިފައިވަނީ މިރޭ 20:30 ގައެވެ. އެމްޑީޕީން ބުނީ މިރޭގެ ޖަލްސާގައި ބައިވެރިވުމަށް ކަނޑުމަގުގެ އިތުރުން ވައިގެ މަގުންވެސް މީހުން އައިސްފައިވާކަމަށެވެ. އެގޮތުން ރާއްޖޭގެ ހުރިހާ ސަރަހައްދަކުންވެސް މީހުން މާލެ އެރިކަމަށް އެޕާޓީގެ އޮފިޝަލަކު ވަނީ ބުނެފައެވެ.
އެމްޑީޕީގެ މުޒާހަރާގައި ބައިވެރިވުމަށް އައި ބަޔަކު..
ސަރުކާރާ ދެކޮޅަށް އެމްޑީޕީން މިރޭ ބޭއްވުމަށް ހަމަޖެހިފައިވާ މުޒާހަރާއާ ގުޅިގެން އިދިކޮޅު ބައެއް ޕާޓީތަކުން ވަނީ، އެމްޑީޕީގެ ހަރަކާތުގައި ބައިވެރިނުވާނޭކަމަށް ބުނެފައެވެ. މީގެ ތެރޭގައި ޖުމްހޫރީ ޕާޓީ ހިމެނެއެވެ.
އެމްޑީޕީން މިރޭގެ މުޒާހަރާއަށް ތައްޔާރުވަމުންދާއިރު، ފުލުހުން ކުރިއަށްގެންދާ އޮޕަރޭޝަނަކާ ގުޅިގެން މިއަދާއި މިރޭގެ އެކި ވަގުތުތަކުގައި އާންމު ޓްރެފިކަށާއި ހިނގާ މީހުންނަށް މާލޭގެ އެކި ސަރަހައްދުތައް ބަންދުކުރެވޭނެ ކަމަށް ފުލުހުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
