އަރިއަތޮޅު ދެކުނުބުރީ ހަންޏާމީދޫގެ ބައެއްގެ ގޮތުގައި އެ އަތޮޅު އުތުރު އަތަފަރު ކަނޑައަޅުއްވައިފި އެވެ.

އެކަމާއި ގުޅޭ ގަރާރު ރައީސުލްޖުމްހޫރިއްޔާގެ އޮފީހުން މިހާރު ވަނީ ނެރުއްވާފަ އެވެ. ރައީސް އޮފީހުން މިރޭ ބުނީ ރައީސުލްޖުމްހޫރިއްޔާގެ ވައުދުފުޅާއެއްގޮތަށް އަރިއަތޮޅު ދެކުނުބުރީ ހަންޏާމީދޫގައި ލޯކަލް ޓޫރިޒަމްގެ އިތުރު ފުރުސަތުތައް ހޯދައިދީ އިގްތިސާދު ކުރިއެރުވުމަށްޓަކައި އަރިއަތޮޅު ދެކުނުބުރީ ހަންޏާމީދޫގެ ބައެއްގެ ގޮތުގައި އެ އަތޮޅު އުތުރު އަތަފަރު (ކޯޑު ނަންބަރު 1218 RF) ފަޅު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒް ކަނޑައަޅުއްވައިފި ކަމަށެވެ.

މިއާއެކު ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ ދަށުން، 2025 ފެބުރުވަރީ 5 ގައި ދިވެހި ސަރުކާރުގެ ގެޒެޓުގައި ޝާއިއުކުރައްވާފައިވާ، ރައީސުލްޖުމްހޫރިއްޔާގެ ގަރާރަށް އިސްލާހް ގެންނަވައި، އެ ގަރާރުގެ ޖަދުވަލުގައި ހިމަނުއްވާފައިވާ ދިވެހިރާއްޖޭގައި މީހުން ދިރިއުޅޭ ރަށްތަކުގެ ލިސްޓު، މިހާރު ވަނީ އަދާހަމަކުރައްވާފަ ކަމަށެވެ.

ހަންޏާމީދޫގެ ބައެއްގެ ގޮތުގައި އެ އަތޮޅު އުތުރު އަތަފަރު ކަނޑައަޅައިދޭން އެ ރަށުގެ ކައުންސިލާއި ރަށު ފަތުރުވެރިކަމުގައި ހަރަކާތްތެރިވާ ވިޔަފާރިވެރީން ވަނީ އެދިފަ އެވެ. އެ ރަށުގެ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން އެކަމުގެ ޔަގީންކަން ރައީސް މިއަދު ވަނީ ދެއްވާފަ އެވެ.