މަޖިދީމަގަށް ދޮންވެލި އަޅާ ސަބަބު އެނގޭތަ؟
މާލެ ސިޓީ މައިމަގު -- މަޖިދީމަގަށް ސިޓީ ކައުންސިލްގެ މުވައްޒިފުން ނިކުމެ ދޮންވެލި އަޅާތާ ދެތީން ރޭ ވެއްޖެ އެވެ.
އެއީ ކީއްކުރަން ކުރާ ކަމެއްތޯއާ އެކަމުގެ ސަބަބުން ކުރިމަތިވެދާނެ ގެއްލުމާއި ނުރައްކަލާއި ގުޅޭ ބަހުސެއް ވަނީ ފެށިފަ އެވެ. މާލޭގެ މައި މަގަށް އަދި އެންމެ ކާރޫބާރު ބޮޑު މަގަށް ދޮންވެލި އަޅާ ސަބަބާއި ގުޅޭގޮތުން ނޫސްވެރިޔާ މުޒައްޔިނު މާލެ ސިޓީ ކައުންސިލާއި ސުވާލުކުރުމުން އެ ކައުންސިލުން ދިނީ ކުރު ޖަވާބެކެވެ.
"ރޯޑް ކޮމްޕެކްޓް ކުރަން ވެގެން," ނޫސްވެރިޔާގެ ސުވާލަށް ކައުންސިލުން ޖަވާބު ދިނީ މިގޮތަށެވެ.
ކައުންސިލުން މި ޖަވާބު ދިންއިރު ސިޓީ ކައުންސިލުން މިހާރު ވެލި އަޅަމުންދާ ގޮތުގެ ސަބަބުން ނުރައްކާތެރި ހާދިސާއެއް / ހާދިސާތަކެއް ކުރިމަތިވެދާނެ ކަމުގެ ކަންބޮޑުވުން އާންމުން ދަނީ ފާޅު ކުރަމުންނެވެ. މަގުގައި އަތުރާފައިވާ ގާތަކުގެ މައްޗަށް ގިނަ އަދަދަކަށް ދޮންވެލި އަޅާފައިވާއިރު މިއީ ސައިކަލު ކަހާލައިގެން ވެއްޓި ހިތާމަވެރި ހާދިސާތަކެއް ހިނގާފާނެ ފަދަ ކަމެކެވެ. އަދި މިގޮތަށް ވެލިތައް ގާތަކުގެ ތެރެއަށް ވަދެ ރަނގަޅަށް ހަމަނުޖެހެނީސް ވާރޭވެހިއްޖެނަމަ އެފަދަ ހާދިސާތައް ހިންގުން އިތުރުވެދާނެ އެވެ.
މީގެ ކުރީން ވެސް އެފަދަ ހާދިސާތައް ހިނގާފައިވެ އެވެ. ކޮމްޕެކްޓް ކުރަން ކަމަށް ބުނެ މީގެ ކުރީން މިގޮތަށް ވެލި ނޭޅި ނަމަވެސް މަގުމަތީގައި ވެލި އެޅިފައި ހުރުމުގެ ސަބަބުން މީހުންނަށް ވަރަށް އަނިޔާވެ ގެއްލުންވެފައިވެ އެވެ.
Advertisement
This content is created and paid for by advertisers and does not involve Voice Journalists
