ވޭލްސް ވެމްބްލީއަށް ދާނީ އެތަނުގައި ޗުއްޓީހޭދަކޮށް މަޖާކުރެަން ނޫންކަމަށާއި، މިރޭ އެޓީމްގެ އަމާޒަކީ އިނގިރޭސިން ބަލިކުރުންކަމަށް ކޯޗް ކްރެއިގް ބެލަމީ ބުނެފިއެވެ.

ރަހުމަތްތެރިކަމުގެ މެޗެއްގައި މިރޭ އިނގިރޭސިންނާ ދެކޮޅަށް ނިކުތުމުގެ ކުރިން ނޫސްވެރިންނާ ވާހަކަދައްކަމުން ބެލަމީ ބުނީ، ވެމްބްލީ އަކީ ވަރަށް ހާއްސަ ތަނެއް ކަމަށާއި، އެހެންކަމާއެކުވެސް މިރޭގެ މެޗަކީ ވޭލްސްއަށް ވަރަށް މުހިންމު މެޗެއްކަމަށެވެ. އިނގިރޭސިންނާ ދެކޮޅަށް މިރޭ ވޭލްސް ނިކުންނައިރު އެޓީމް އެންމެފަހުން ކެނެޑާއާ އެކު ކުޅުނުމެޗުންވެސް ވަނީ ބަލިވެފައެވެ. އެމެޗް ކެނެޑާ ކާމިޔާބުކުރީ އެކެއް ސުމެއްގެ ނަތީޖާއަކުންނެވެ.

ބެލަމީ ބުނީ އިނގިރޭސިންނާ ދެކޮޅަށް ކުޅެ މޮޅުވުމަކީ ފަސޭހަކަމެއް ނޫންކަމަށާއި، އެހެންނަމަވެސް މެޗުން ރަނގަޅު ނަތީޖާއެއް ނެރުމަށް އޭނާގެ ޓީމްގެ ކުޅުންތެރިން ކުޅޭނީ މެޗުން މޮޅުވުމުގެ ރޫހުގައިކަމަށެވެ. ވޭލްސް މިރޭ އިންގްލެންޑާ ދެކޮޅަށް ނިކުންނައިރު އެޓީމަށް ލިބޭނޭ އެންމެބޮޑު ހިތްހަމަ ޖެހުމަކީ އަނިޔާގެ ސަބަބުން އިނގިރޭސިންގެ އެއްވަނަ ފޯވަޑް ހެރީ ކޭންއަށް ނުކުޅެވުމެވެ.

ވޭލްސްގެ ކޯޗް ބެލަމީ ބުނެފައިވަނީ ކޭންއަކީ އޭނާ މިހާތަނަށް ދުށް އެންމެ މޮޅު ފޯވާޑް ކަމަށާއި، އޭނާ ނެތުމަކީ އިނގިރޭސިންނަށް ލިބުނު ދެރައެއްކަމަށެވެ.

ވަރލްޑްކަޕް ކޮލިފައިން މެޗްތަކަށް ބަލާއިރު ވޭލްސް ހިމެނޭ ގްރޫޕް ޖޭގައި އެޓީމް މިހާރު އޮތީ 10 ޕޮއިންޓާއެކު ތާވަލުގެ ތިން ވަނާގައެވެ. ޕޮއިންޓް ތާވަލަށް ބަލާއިރު ވަރލްޑްކަޕަށް ކޮލިފައިވުމުގެ ފުރުސަތު ވޭލްސްއަށް އަދި އެބައޮތެވެ. ކޮލިފައިންގައި މިރޭ ވޭލްސް އިނގިރޭސިންނާ ދެކޮޅަށް ކުޅޭ މެޗް ފަށާނީ ރާއްޖެގަޑިން ދަންވަރު 11:45 ގައެވެ.